چیف جسٹس محمد کامران خان ملاخیل نے بلوچستان ہائی کورٹ کے تین نئے ایڈیشنل ججز سے حلف لے لیا

کوئٹہ: چیف جسٹس بلوچستان ہائی کورٹ جسٹس محمد کامران خان ملاخیل نے بلوچستان ہائی کورٹ کے تین نئے تعینات ہونے والے ایڈیشنل ججز سے عدالت عالیہ کے آڈیٹوریم ہال میں منعقدہ سادہ مگر پروقار تقریب میں ان کے عہدوں کا حلف لیا۔

حلف اٹھانے والوں میں جسٹس محمد رؤف عطا، جسٹس اللہ داد روشان اور جسٹس عبدالقیوم لہڑی شامل ہیں۔ تقریب میں بلوچستان ہائی کورٹ کے معزز ججز، عدلیہ کے افسران و اہلکاروں، وکلا تنظیموں کے عہدیداران، سینئر وکلا اور وکلا کی بڑی تعداد نے شرکت کی اور نئے ایڈیشنل ججز کو عدالتی ذمہ داریاں سنبھالنے پر مبارکباد پیش کی گئی۔

یاد رہے کہ صدرِ مملکت نے آئینِ اسلامی جمہوریہ پاکستان کے آرٹیکل 197 کو آرٹیکل 175A کی شق (8) کے ساتھ ملا کر حاصل اختیارات کے تحت بلوچستان ہائی کورٹ میں تین ایڈیشنل ججز کی تقرری کی منظوری دی تھی۔ نوٹیفکیشن کے مطابق تینوں ایڈیشنل ججز کی ایک سالہ مدت حلف اٹھانے کی تاریخ سے شروع ہوگی۔

تصویر: بشکریہ ڈی جی پی آر بلوچستان