لورالائی میں غیر قانونی اسلحہ کے خلاف کارروائی، اسسٹنٹ کمشنر ندیم اکرم نے بغیر لائسنس اسلحہ کی دکان سیل کر دی

لورالائی: ہوم ڈیپارٹمنٹ حکومت بلوچستان کے احکامات اور کمشنر لورالائی ڈویژن ولی محمد بڑیچ کی خصوصی ہدایات پر اسسٹنٹ کمشنر لورالائی ندیم اکرم نے غیر قانونی اسلحہ کے کاروبار کے خلاف کارروائی کرتے ہوئے شہر میں بغیر لائسنس قائم اسلحہ کی ایک دکان سیل کر دی۔

کارروائی کے دوران ایس ڈی پی او غلام اکبر بھی اسسٹنٹ کمشنر کے ہمراہ تھے، جبکہ ضلعی انتظامیہ اور پولیس کی مشترکہ ٹیم نے دکان کا معائنہ کیا۔ ابتدائی جانچ میں دکان کا مالک اسلحہ کی خرید و فروخت کا مطلوبہ قانونی لائسنس پیش نہ کر سکا، جس پر بلوچستان آرمز ایکٹ 2022 کے تحت دکان فوری طور پر سیل کر دی گئی۔

اسسٹنٹ کمشنر ندیم اکرم نے دکان کے مالک کو ہدایت کی کہ وہ ہوم ڈیپارٹمنٹ حکومت بلوچستان سے باقاعدہ لائسنس حاصل کر کے تمام قانونی تقاضے پورے کرے، بصورت دیگر دکان سیل رہے گی اور قانون کے مطابق مزید کارروائی بھی عمل میں لائی جا سکتی ہے۔

ضلعی انتظامیہ کے مطابق غیر قانونی اسلحہ کی خرید و فروخت، ذخیرہ اندوزی اور بغیر لائسنس کاروبار کسی صورت برداشت نہیں کیا جائے گا اور شہریوں کے جان و مال کے تحفظ اور امن و امان کے قیام کے لیے ایسے عناصر کے خلاف بلاامتیاز کارروائیاں جاری رہیں گی۔

انتظامیہ نے شہریوں سے اپیل کی کہ غیر قانونی اسلحہ کی خرید و فروخت یا مشکوک سرگرمیوں کی اطلاع فوری طور پر انتظامیہ یا پولیس کو دیں تاکہ بروقت کارروائی ہو سکے۔ حکام کے مطابق قانون کی بالادستی اور عوامی تحفظ کے لیے تمام ادارے مشترکہ حکمت عملی کے تحت کارروائیاں جاری رکھے ہوئے ہیں اور ضلع بھر میں اسلحہ کی دکانوں، لائسنسوں اور دیگر حساس مقامات کی جانچ کا سلسلہ مزید تیز کیا جائے گا۔

تصویر: بشکریہ ڈی جی پی آر بلوچستان