زیارت: الہجرہ کالج کی باؤنڈری وال میں تاخیر، ڈپٹی کمشنر کا ٹھیکیدار کمپنی بلیک لسٹ کرنے کا حکم

زیارت: ڈپٹی کمشنر زیارت عبدالقدوس اچکزئی کی زیرِ صدارت بی ایس ڈی آئی فیز ون، فیز ٹو اور فیز تھری کی ترقیاتی سکیمات کے حوالے سے ڈسٹرکٹ کوآرڈینیشن کمیٹی/ڈسٹرکٹ ڈویلپمنٹ کمیٹی کا جائزہ اجلاس منعقد ہوا۔

اجلاس میں لیفٹیننٹ کرنل/ونگ کمانڈر 155 ونگ زیشان، میجر عامر، ایکسین پی ایچ ای تیمور آغا، ایس ڈی او ایریگیشن اعجاز الدین، ایس ڈی او سی اینڈ ڈبلیو میرو خان بگٹی، سب انجینئر غیاث محمد اور نمائندہ میونسپل کمیٹی زیارت میرا جان نے شرکت کی۔

اجلاس کو بتایا گیا کہ بی ایس ڈی آئی فیز ون کی 11 میں سے 10 سکیمات مکمل ہو چکی ہیں، جبکہ الہجرہ کالج کی باؤنڈری وال کی تعمیر 30 جولائی تک مکمل کر لی جائے گی۔

ٹھیکیدار کمپنی کو بلیک لسٹ کرنے کی ہدایت

ڈپٹی کمشنر نے فیز ون کی سکیم الہجرہ کالج کی باؤنڈری وال کی تعمیر میں سست روی پر سخت برہمی کا اظہار کیا۔ انہوں نے کہا کہ یہ سکیم سکول کے طلبہ کے تحفظ کے حوالے سے انتہائی اہمیت کی حامل ہے، تاہم متعلقہ ٹھیکیدار کمپنی کی غفلت اور تاخیر کے باعث منصوبے کی بروقت تکمیل خطرے میں پڑ گئی ہے۔ انہوں نے متعلقہ ایکسین کو ہدایت کی کہ ٹھیکیدار کمپنی کو فوری طور پر بلیک لسٹ کیا جائے۔

مزید بتایا گیا کہ بی ایس ڈی آئی فیز ٹو کی 37 سکیمات پر اوسطاً 75 فیصد سے زائد پیش رفت ہو چکی ہے، جبکہ فیز تھری میں بھی عوامی فلاح و بہبود سے متعلق اہم ترقیاتی سکیمات شامل ہیں جن کا ٹینڈرنگ پراسس جاری ہے۔

ڈپٹی کمشنر نے ہدایت کی کہ بلوچستان اسپیشل ڈویلپمنٹ انیشی ایٹو کے تحت جاری تمام ترقیاتی منصوبے بروقت، شفاف اور اعلیٰ معیار کے مطابق مکمل کیے جائیں اور واضح کیا کہ ناقص اور غیر معیاری کام کسی صورت برداشت نہیں کیا جائے گا۔

اجلاس سے خطاب کرتے ہوئے ونگ کمانڈر نے کہا کہ تمام ترقیاتی کام بروقت اور معیاری انداز میں مکمل کیے جائیں تاکہ عوام کو ان کے ثمرات جلد از جلد میسر آ سکیں۔

تصویر: بشکریہ ڈی جی پی آر بلوچستان