بلوچستان انفارمیشن کمیشن کی حقِ معلومات ایکٹ پر آگاہی ورکشاپ، کمشنر عبدالشکور نے اسناد تقسیم کیں

کوئٹہ: بلوچستان انفارمیشن کمیشن کے زیر اہتمام حقِ معلومات ایکٹ سے متعلق ایک روزہ آگاہی ورکشاپ منعقد ہوئی، جس میں سول سوسائٹی کے نمائندوں، طلبہ اور قانون کے شعبے سے تعلق رکھنے والے افراد نے شرکت کی۔

سیشن سے خطاب کرتے ہوئے کمشنر بلوچستان انفارمیشن کمیشن عبدالشکور نے کہا کہ حقِ معلومات کا قانون شفاف، جوابدہ اور عوام دوست طرزِ حکمرانی کے فروغ میں بنیادی کردار ادا کرتا ہے۔ انہوں نے کہا کہ شہریوں کو سرکاری معلومات تک بروقت رسائی فراہم کرنا ریاستی اداروں کی ذمہ داری ہے، جبکہ معلومات تک رسائی سے نہ صرف عوام کا اعتماد بحال ہوتا ہے بلکہ گورننس کے نظام میں بھی بہتری آتی ہے۔

انہوں نے کہا کہ بلوچستان انفارمیشن کمیشن عوام میں حقِ معلومات کے قانون سے متعلق شعور اجاگر کرنے کے لیے مختلف اضلاع میں آگاہی پروگراموں کا انعقاد جاری رکھے گا تاکہ زیادہ سے زیادہ شہری اپنے قانونی حق سے آگاہ ہو سکیں۔

ورکشاپ کے اختتام پر کمشنر عبدالشکور نے شرکا میں اسناد تقسیم کیں اور امید ظاہر کی کہ شرکا حقِ معلومات کے پیغام کو معاشرے کے مختلف طبقات تک پہنچانے میں مؤثر کردار ادا کریں گے۔ شرکا نے آگاہی نشست کے انعقاد کو خوش آئند قرار دیتے ہوئے حقِ معلومات کے قانون کے فروغ کے لیے کمیشن کی کاوشوں کو سراہا۔

تصویر: بشکریہ ڈی جی پی آر بلوچستان