موسیٰ خیل کے علاقے کارڈی کوچ میں لائیو اسٹاک کا فری ویٹرنری کیمپ، 1400 سے زائد مویشیوں کا علاج

موسیٰ خیل: گزشتہ روز تحصیل کنگری میں منعقدہ کھلی کچہری کے دوران کمشنر لورالائی ڈویژن ولی محمد بڑیچ کی جانب سے صادر کردہ احکامات اور ڈپٹی کمشنر موسیٰ خیل عبدالرزاق خان خجک کی ہدایات پر عمل درآمد کرتے ہوئے محکمہ لائیو اسٹاک کی جانب سے علاقے کارڈی کوچ میں ایک روزہ فری موبائل ویٹرنری کیمپ کا انعقاد کیا گیا۔

کیمپ کی قیادت فیلڈ انچارج ڈاکٹر شیراز حسنی اور ان کی ٹیم نے کی، جبکہ انتظامی و دیگر امور کی نگرانی ڈپٹی ڈائریکٹر لائیو اسٹاک موسیٰ خیل ڈاکٹر غلام محمود نے کی۔ کیمپ کے دوران مال مویشی پال حضرات کو ان کی دہلیز پر مفت طبی اور حفاظتی سہولیات فراہم کی گئیں۔

ویکسین اور علاج

ماہرینِ حیوانات نے مویشیوں کو مختلف خطرناک اور مہلک بیماریوں سے محفوظ رکھنے کے لیے ایچ ایس ویکسین (گل گھوٹو)، لمپی سکن ڈیزیز ویکسین اور ای ٹی وی ویکسین (انتڑیوں کے زہر) لگائی، جبکہ مختلف بیماریوں میں مبتلا جانوروں کو اینٹی بائیوٹک سمیت ضروری ادویات بھی فراہم کی گئیں۔

کیمپ کے دوران مویشیوں کو چچڑوں اور بیرونی کیڑوں سے محفوظ رکھنے کے لیے اسپرے کیا گیا، جبکہ جانوروں کی صحت اور قوتِ مدافعت بہتر بنانے کے لیے ڈیورمنگ اور وٹامن ٹانک بھی فراہم کیے گئے۔

محکمہ لائیو اسٹاک کے مطابق کیمپ میں مجموعی طور پر 1200 چھوٹے مویشیوں، جن میں بھیڑیں اور بکریاں شامل ہیں، جبکہ 200 بڑے مویشیوں (گائے) کی ویکسینیشن اور علاج معالجہ کیا گیا۔ اس کے علاوہ متعدد اونٹوں کو بھی ضروری طبی سہولیات فراہم کی گئیں۔

اس موقع پر علاقے کے مال مویشی مالکان اور عوام نے کھلی کچہری میں اٹھائے گئے عوامی مسائل پر فوری عمل درآمد کو سراہتے ہوئے کمشنر لورالائی ڈویژن ولی محمد بڑیچ، ڈپٹی کمشنر موسیٰ خیل عبدالرزاق خان خجک اور محکمہ لائیو اسٹاک کے حکام کا شکریہ ادا کیا۔

انہوں نے کہا کہ موبائل ویٹرنری کیمپ کے انعقاد سے دور دراز علاقوں میں مال مویشی پال افراد کو ان کی دہلیز پر طبی سہولیات میسر آئیں، جس سے علاقے کے مویشیوں کی صحت اور مال مویشی پال خاندانوں کے معاشی مفادات کو بھی تحفظ ملے گا۔

تصویر: بشکریہ ڈی جی پی آر بلوچستان