گورنمنٹ ڈگری کالج زیارت میں یوم دفاع پاکستان کی تقریب، اسسٹنٹ کمشنر شیر شاہ غلزئی مہمان خصوصی

زیارت: وزیر اعلیٰ بلوچستان میر سرفراز بگٹی کے وژن، ڈپٹی کمشنر زیارت عبدالقدوس اچکزئی کی ہدایت اور پرنسپل گورنمنٹ ڈگری کالج زیارت پروفیسر نقیب اللہ کاکڑ کی سربراہی میں 6 ستمبر یومِ دفاعِ پاکستان کے حوالے سے کالج میں ایک پروقار اور ملی جذبے سے بھرپور تقریب منعقد کی گئی۔

تقریب کے مہمانِ خصوصی اسسٹنٹ کمشنر زیارت شیر شاہ غلزئی تھے، جبکہ کالج کے اساتذہ، طلبہ اور دیگر افراد نے بھرپور شرکت کی۔ تقریب کا مقصد طلبہ میں حب الوطنی، قومی یکجہتی اور قربانی کے جذبے کو اجاگر کرنا اور نوجوان نسل کو یومِ دفاع کی تاریخی اہمیت سے آگاہ کرنا تھا۔

تلاوتِ کلامِ پاک کے بعد طلبہ نے قومی ترانہ، ملی نغمے، تقاریر اور دیگر پروگرام پیش کیے اور 6 ستمبر 1965ء کو وطن کے دفاع کے لیے پاک فوج کے جوانوں، شہداء اور قومی ہیروز کی قربانیوں کو خراجِ تحسین پیش کیا۔ مقررین نے کہا کہ 6 ستمبر قومی تاریخ کا قابلِ فخر دن ہے جب قوم نے مسلح افواج کے شانہ بشانہ متحد ہو کر وطن کے دفاع کا ثبوت دیا، اور یہ دن ہمیں اتحاد، نظم و ضبط اور حب الوطنی کا درس دیتا ہے۔

اسسٹنٹ کمشنر شیر شاہ غلزئی نے طلبہ کے پروگرامز کو سراہتے ہوئے کہا کہ نوجوان نسل ملک کا مستقبل ہے اور طلبہ تعلیم کے ساتھ قومی ذمہ داریوں، نظم و ضبط اور حب الوطنی کو بھی اپنی زندگی کا حصہ بنائیں۔ پرنسپل پروفیسر نقیب اللہ کاکڑ نے کہا کہ ایسے پروگرام طلبہ میں قومی شعور اور وطن سے محبت کو فروغ دیتے ہیں اور قوم اپنے بہادر سپوتوں کی قربانیوں کو ہمیشہ یاد رکھے گی۔

تقریب سے پروفیسر کریم کاکڑ، پروفیسر عجب خان اور نصیب اللہ کاکڑ نے بھی خطاب کیا۔ طلبہ نے جوش و جذبے کا مظاہرہ کرتے ہوئے پاکستان کے حق میں نعرے لگائے اور آخر میں شہداء کے درجات کی بلندی اور ملک کی سلامتی، امن اور خوشحالی کے لیے دعا کی گئی۔

تصویر: بشکریہ ڈی جی پی آر بلوچستان