ہنگلاج ماتا استھان میں نوراتری پر درگا اشٹمی کی خصوصی پوجا، ملک بھر سے یاتریوں کی شرکت

کوئٹہ: بلوچستان کے تاریخی مذہبی مقام ہنگلاج ماتا استھان میں نوراتری کے موقع پر درگا اشٹمی کی خصوصی پوجا مذہبی عقیدت و احترام کے ساتھ ادا کی گئی، جس میں ملک بھر سے بڑی تعداد میں ہندو یاتریوں نے شرکت کی۔ ان میں سینکڑوں پیدل یاتری بھی شامل تھے۔

حکومت بلوچستان کے خصوصی تعاون سے یاتریوں کے لیے خصوصی انتظامات کیے گئے اور سہولیات کی فراہمی یقینی بنانے کے لیے متعلقہ اداروں نے اقدامات کیے۔ ہندو برادری اور یاتریوں نے انتظامات پر اطمینان کا اظہار کرتے ہوئے حکومت بلوچستان اور ضلعی انتظامیہ کی کاوشوں کو سراہا۔

فوکل پرسن کی تقرری

اس سال کی تقریبات کی ایک اہم خصوصیت یہ رہی کہ پہلی مرتبہ حکومت بلوچستان کی جانب سے صوبے کی پہلی ہندو خاتون اسسٹنٹ کمشنر کاشش چوہدری کو فوکل پرسن مقرر کیا گیا۔ انہوں نے انتظامات کی نگرانی اور یاتریوں کو سہولیات کی فراہمی میں اہم کردار ادا کیا۔

سینیٹر دنیش کمار نے وزیراعلیٰ بلوچستان میر سرفراز بگٹی اور صوبائی حکومت کے تعاون کو سراہتے ہوئے کہا کہ ہنگلاج ماتا استھان میں کیے گئے انتظامات بین المذاہب ہم آہنگی، مذہبی رواداری اور اقلیتوں کے مذہبی حقوق کے احترام کی عکاسی کرتے ہیں۔

انہوں نے کہا کہ مذہبی مقامات پر آنے والے یاتریوں کو سہولیات کی فراہمی اور ان کے مذہبی شعائر کے احترام کو یقینی بنانا معاشرے میں باہمی احترام اور ہم آہنگی کے فروغ کے لیے اہم ہے۔

یاتریوں نے بھی حکومت بلوچستان، ضلعی انتظامیہ اور متعلقہ اداروں کے اقدامات کو قابلِ تحسین قرار دیتے ہوئے کہا کہ بہتر انتظامات سے انہیں مذہبی رسومات پرامن اور باوقار انداز میں ادا کرنے میں مدد ملی۔

ہنگلاج ماتا استھان میں درگا اشٹمی کی تقریبات کا انعقاد بلوچستان میں مذہبی رواداری، باہمی احترام اور مختلف مذاہب سے تعلق رکھنے والی برادریوں کے مذہبی حقوق کے تحفظ کی اہمیت کو اجاگر کرتا ہے۔

تصویر: بشکریہ ڈی جی پی آر بلوچستان