خاران: نصیر کبدانی لبزانکی دیوان کے وفد کی ایڈیشنل کمشنر رخشان ڈویژن ظفر گویا سے ملاقات

خاران: نصیر کبدانی لبزانکی دیوان خاران کے وفد نے ایڈیشنل کمشنر رخشان ڈویژن ظفر گویا سے ان کے دفتر میں ملاقات کی۔ ملاقات کا مقصد انہیں خاران میں تعیناتی پر مبارکباد دینا اور علاقے میں ادبی و علمی ماحول کو مزید فعال بنانے پر تبادلۂ خیال کرنا تھا۔

وفد کی قیادت جنرل سیکرٹری شکور زائد نے کی، جبکہ دیگر اراکین میں نائب صدر سفر خان راسکوئی، قیوم سادگ، حبیب دانش، جلال فراق، محمد عیسیٰ محمد حسنی، شہزاد سلیم، محمود پیرک اور نجیب بلوچ شامل تھے۔

وفد نے امید ظاہر کی کہ ظفر گویا کی تعیناتی سے خاران میں علم و ادب، زبان اور ثقافت کے فروغ کو نیا تحرک ملے گا اور ادیبوں، شاعروں اور کالم نگاروں کی حوصلہ افزائی کے لیے حکومتی سطح پر مثبت اقدامات کیے جائیں گے۔ وفد نے انہیں نصیر کبدانی لبزانکی دیوان اکیڈمی خاران کے دورے کی باضابطہ دعوت بھی دی۔

ایڈیشنل کمشنر ظفر گویا نے وفد کا شکریہ ادا کرتے ہوئے کہا کہ ادبی اور ثقافتی سرگرمیاں کسی بھی معاشرے کی مثبت قدروں کی امین ہوتی ہیں اور مقامی زبان و ادب کے فروغ کے لیے ہر ممکن تعاون فراہم کیا جائے گا۔ ملاقات میں لبزانکی دیوان کی شائع کردہ معیاری کتب کا ایک سیٹ بطور تحفہ انہیں پیش کیا گیا۔

تصویر: بشکریہ ڈی جی پی آر بلوچستان