پنجاب بھر میں 15 اکتوبر تک دفعہ 144 نافذ، 5 سے زائد افراد کے اجتماع پر پابندی

لاہور (اعتماد ڈیسک): محکمہ داخلہ پنجاب نے دہشت گردی کے خطرات کی اطلاعات پر صوبے بھر میں 15 اکتوبر تک دفعہ 144 نافذ کر دی ہے، جس کے تحت عوامی مقامات، شاہراہوں اور کھلی جگہوں پر 5 یا اس سے زائد افراد کے اجتماع، جلوس، ریلی، جلسے اور دھرنے پر پابندی ہوگی۔

نوٹیفکیشن کے مطابق عوامی مقامات پر ہر قسم کے ہتھیار لے جانے اور ان کی نمائش پر بھی پابندی ہوگی، جبکہ غیر قانونی اجتماعات میں شرکت کے لیے لوگوں کو اکسانا یا ترغیب دینا بھی ممنوع ہوگا۔

پابندی کا اطلاق شادی کی تقریبات، نماز جنازہ، تدفین، مساجد اور دیگر عبادت گاہوں پر نہیں ہوگا۔ عدالتیں، سرکاری ادارے، باضابطہ اجازت سے ہونے والی تقریبات، قانون نافذ کرنے والے ادارے، انٹیلیجنس ایجنسیاں اور ڈیوٹی پر موجود سکیورٹی اہلکار بھی مستثنیٰ ہوں گے۔

حکام کے مطابق قانون نافذ کرنے والے اداروں اور انٹیلیجنس ایجنسیوں نے فوری نوعیت کے خطرات کی اطلاع دی تھی اور رپورٹس میں دہشت گرد تنظیموں کی جانب سے عوامی اجتماعات کو نشانہ بنانے کے منصوبے کا خدشہ ظاہر کیا گیا تھا۔ محکمہ داخلہ کا کہنا ہے کہ عوامی اجتماعات دہشت گرد حملوں کا آسان ہدف بن سکتے ہیں، اس لیے شہریوں کے جان و مال کے تحفظ کے لیے یہ قدم اٹھایا گیا ہے۔