لاہور ہائیکورٹ کا ایم ڈی کیٹ 2026ء کے تمام کوڈز کے سوالیہ پرچے ویب سائٹ پر اپ لوڈ کرنے کا حکم

لاہور: لاہور ہائیکورٹ نے ایم ڈی کیٹ 2026ء کے امیدواروں سے متعلق اہم فیصلہ سناتے ہوئے پنجاب میں ہونے والے امتحان کے تمام کوڈز کے سوالیہ پرچے ویب سائٹ پر اپ لوڈ کرنے کا حکم دے دیا۔

عدالت نے قرار دیا کہ سوالیہ پرچے داخلہ عمل مکمل ہونے تک عوام کے لیے دستیاب رہیں گے، جبکہ داخلہ پراسس مکمل ہونے کے بعد امیدواروں سے متعلقہ پالیسی کے تحت اعتراضات بھی طلب کیے جائیں گے۔

تحریری فیصلہ

جسٹس سید احسن رضا کاظمی نے ریان شاہد کی درخواست پر جاری کیے گئے 11 صفحات پر مشتمل تحریری فیصلے میں قرار دیا کہ پی ایم ڈی سی کی جانب سے 10 ستمبر کو سوالیہ پرچے واپس لینے کے مراسلے کا کوئی مناسب جواز پیش نہیں کیا گیا۔

فیصلے میں کہا گیا کہ امیدوار ہارڈ کاپی اور ویب سائٹ، دونوں ذرائع سے پرچوں تک رسائی سے محروم رہے۔

عدالت نے ریمارکس دیے کہ 180 سوالات صرف یادداشت کے بل بوتے پر یاد رکھ کر ان پر اعتراضات اٹھانا عملی طور پر ممکن نہیں، جبکہ اعتراضات اور ری چیکنگ کا طریقہ کار اگرچہ کاغذوں میں موجود تھا، لیکن عملی طور پر مؤثر ثابت نہیں ہوا۔

تحریری فیصلے کے مطابق یو ایچ ایس کے وکیل نے موقف اختیار کیا کہ امیدواروں کو گائیڈ لائنز کے مطابق سوالیہ پرچہ ساتھ لے جانے کی اجازت تھی اور اس اجازت میں بعد ازاں کوئی ترمیمی مراسلہ جاری نہیں کیا گیا۔

عدالت نے ابتدائی اعتراض مسترد کرتے ہوئے قرار دیا کہ امتحانی معاملات بھی عدالتی نظرثانی سے بالاتر نہیں ہیں۔

فیصلے میں واضح کیا گیا کہ یہ حکم صرف پنجاب میں منعقد ہونے والے ایم ڈی کیٹ 2026ء کے سوالیہ پرچوں تک محدود ہوگا۔

عدالت نے رجسٹرار یو ایچ ایس کے عدالتی حکم کے باوجود پیش نہ ہونے پر بھی ناراضگی کا اظہار کیا۔