ایس پی ہرنائی کی زیر صدارت کرائم اینڈ پروگریس ریویو اجلاس، زیرِ التوا کیسز جلد نمٹانے کی ہدایت

ہرنائی: ڈی آئی جی لورالائی رینج کی ہدایات کی روشنی میں ایس پی آفس ہرنائی میں کرائم اینڈ پروگریس ریویو اجلاس منعقد ہوا۔ اجلاس کی صدارت ایس پی ہرنائی نے کی، جس میں ضلع ہرنائی کے تمام ایس ایچ اوز اور انویسٹی گیشن افسران نے شرکت کی۔

اجلاس میں ضلع ہرنائی میں امن و امان کی مجموعی صورتحال، سنگین مقدمات کی پیش رفت، زیرِ التوا کیسز اور تمام تھانوں کی کارکردگی کا باریک بینی سے جائزہ لیا گیا۔ ایس پی ہرنائی نے تھانوں کی انویسٹی گیشن فائلز کا معائنہ کرتے ہوئے تفتیشی افسران کی کارکردگی کو پرکھا۔

ایس پی ہرنائی نے کہا کہ جرائم کا خاتمہ اور شہریوں کے جان و مال کا تحفظ پولیس کی اولین ترجیح ہے۔ انہوں نے ہدایت کی کہ تمام زیرِ التوا کیسز کی تفتیش میرٹ پر جلد از جلد مکمل کر کے چالان عدالتوں میں جمع کرائے جائیں، ضلع بھر کے حساس مقامات پر گشت اور ناکہ بندی کا نظام مزید سخت کیا جائے تاکہ جرائم پیشہ عناصر کا قلع قمع ہو سکے، اور تھانوں میں آنے والے سائلین کے ساتھ خوش اخلاقی سے پیش آ کر ان کی شکایت پر فوری قانونی کارروائی کی جائے۔

اجلاس کے اختتام پر تمام افسران کو جاری کردہ ہدایات پر روح کے مطابق عمل درآمد کرنے اور کارکردگی رپورٹ باقاعدگی سے اعلیٰ حکام کو ارسال کرنے کی ہدایت کی گئی۔

تصویر: بشکریہ ڈی جی پی آر بلوچستان