ڈپٹی کمشنر صحبت پور فریدہ ترین کا او جی ڈی سی ایل کے زیر تعمیر 100 گھروں کا دورہ، معیار پر سمجھوتہ نہ کرنے کی ہدایت

صحبت پور: ڈپٹی کمشنر صحبت پور فریدہ ترین نے او جی ڈی سی ایل (OGDCL) کی جانب سے مقامی لوگوں کے لیے تعمیر کیے جانے والے 100 نئے گھروں کا تفصیلی دورہ کیا اور جاری تعمیراتی کام کا موقع پر جائزہ لیا۔ انہوں نے تعمیر میں استعمال ہونے والے میٹریل، تعمیراتی معیار، بنیادی سہولیات اور دیگر امور کا باریک بینی سے معائنہ کیا۔

ڈپٹی کمشنر نے متعلقہ حکام اور تعمیراتی عملے کو ہدایت کی کہ منصوبے میں تعمیراتی معیار پر کوئی سمجھوتہ نہ کیا جائے اور تمام کام مقررہ معیار اور طے شدہ مدت کے اندر مکمل کیے جائیں۔ انہوں نے کہا کہ منصوبے میں شفافیت ہر صورت یقینی بنائی جائے تاکہ مستحق افراد کو بروقت معیاری اور محفوظ رہائش ملے اور وہ اپنے نئے گھروں میں باعزت طور پر آباد ہو سکیں۔

فریدہ ترین نے کہا کہ صحبت پور کے مقامی لوگوں کے لیے او جی ڈی سی ایل کی جانب سے 100 گھروں کی تعمیر ایک قابلِ تحسین فلاحی اقدام ہے، جس سے مستحق خاندانوں کو بہتر رہائشی سہولیات میسر آئیں گی اور ان کا معیارِ زندگی بھی بہتر ہوگا۔

انہوں نے او جی ڈی سی ایل انتظامیہ کا شکریہ ادا کیا اور امید ظاہر کی کہ کمپنی مستقبل میں بھی صحبت پور کے عوام کی فلاح و بہبود، بنیادی سہولیات کی فراہمی اور دیگر سماجی ترقیاتی منصوبوں میں اسی جذبے کے ساتھ مثبت اور مؤثر کردار ادا کرتی رہے گی۔

تصویر: بشکریہ ڈی جی پی آر بلوچستان