میرانی ڈیم کمانڈ ایریا میں پانی چوری کے خلاف کارروائی، کیچ انتظامیہ نے متعدد غیر قانونی کنکشن منقطع کر دیے

تربت: ڈپٹی کمشنر کیچ یاسر اقبال دشتی کی ہدایت پر ضلعی انتظامیہ کیچ اور محکمہ ایریگیشن نے میرانی ڈیم کمانڈ ایریا میں پانی کی غیر قانونی ترسیل اور پانی چوری کے خلاف کارروائی کرتے ہوئے متعدد غیر قانونی کنکشن منقطع کر دیے۔

کارروائی نائب تحصیلدار دشت باہوٹ دشتی اور محکمہ ایریگیشن میرانی ڈیم کے شیر جان بلوچ کی نگرانی میں عمل میں لائی گئی۔ اس دوران غیر قانونی طور پر نصب پائپ ہٹا کر تلف کر دیے گئے اور پانی کی غیر قانونی ترسیل کے ذرائع بھی ختم کر دیے گئے۔

حکام نے پانی چوری میں ملوث افراد کو سختی سے ہدایت کی کہ وہ غیر قانونی کنکشنز اور پانی کے غیر مجاز استعمال سے فوری طور پر گریز کریں، بصورتِ دیگر قانون کے مطابق مزید سخت کارروائی کی جائے گی۔

ڈپٹی کمشنر یاسر اقبال دشتی نے واضح کیا کہ میرانی ڈیم اور اس کے کمانڈ ایریا میں پانی کے منصفانہ اور قانونی استعمال کو یقینی بنانا ضلعی انتظامیہ کی اولین ترجیحات میں شامل ہے۔ انہوں نے ہدایت کی کہ پانی چوری اور غیر قانونی کنکشنز کے خلاف کارروائی بلاامتیاز جاری رکھی جائے تاکہ تمام مستحق کاشتکار دستیاب آبی وسائل سے منصفانہ استفادہ کر سکیں۔

انہوں نے کہا کہ زرعی شعبے کی بہتری اور کاشتکاروں کو ان کے جائز حصے کا پانی دینے کے لیے انتظامیہ ہر ممکن اقدام اٹھا رہی ہے، اور افسران کو ہدایت کی کہ کمانڈ ایریا میں پانی کی تقسیم کے نظام کی باقاعدگی سے نگرانی کی جائے اور کسی بھی غیر قانونی سرگرمی پر فوری کارروائی کی جائے۔

ضلعی انتظامیہ نے واضح کیا کہ پانی ایک قومی اور اجتماعی اثاثہ ہے، اس کے غیر قانونی استعمال اور چوری کی کسی صورت اجازت نہیں دی جائے گی۔

تصویر: بشکریہ ڈی جی پی آر بلوچستان