گرین بس سروس ڈیجیٹل ہوگی: موبائل ایپ پر روٹس، لائیو ٹریکنگ اور ای ٹکٹنگ کی تجاویز، کمشنر کوئٹہ کا اجلاس

کوئٹہ: کمشنر کوئٹہ ڈویژن ذیشان لاشاری کی زیرِ صدارت گرین بس سروس کو ڈیجیٹائز کرنے اور عوام کو بہتر سفری سہولیات کی فراہمی سے متعلق اجلاس منعقد ہوا، جس میں سروس کو جدید خطوط پر استوار کرتے ہوئے ڈیجیٹل نظام سے ہم آہنگ کرنے کے امور کا جائزہ لیا گیا۔

اجلاس میں ایڈیشنل سیکرٹری ٹرانسپورٹ، ایم ڈی پی ایم ٹی اے، ڈائریکٹر جنرل پی ٹی سی بی، سی ای او پی پی پی، سیکرٹری آر ٹی اے کوئٹہ، اسسٹنٹ کمشنر سٹی کوئٹہ، سی سی او ٹی ایس پی ایل، چیف آپریٹنگ آفیسر اور دیگر افسران موجود تھے۔

موبائل پر روٹس اور لائیو ٹریکنگ

اجلاس میں زور دیا گیا کہ گرین بس سروس کے نظام کو مرحلہ وار جدید اور ڈیجیٹلائز کیا جائے تاکہ شہریوں کو بس سروس سے متعلق تمام معلومات موبائل فون پر دستیاب ہوں۔ تجویز کردہ نظام کے تحت شہری موبائل ایپ یا ویب پورٹل کے ذریعے روٹس، بس اسٹاپس، اوقاتِ کار، کرایوں اور دیگر سفری معلومات حاصل کر سکیں گے۔

لائیو بس ٹریکنگ کی سہولت کی تجویز بھی دی گئی تاکہ مسافروں کو معلوم ہو سکے کہ ان کی مطلوبہ بس اس وقت کہاں ہے اور اگلی بس کتنی دیر میں اسٹاپ پر پہنچے گی۔ ڈیجیٹل ٹکٹنگ، الیکٹرانک ادائیگی، بس اسٹاپس پر ڈیجیٹل ڈسپلے، مسافروں کے لیے معلوماتی نظام اور شکایات و تجاویز کے آن لائن اندراج اور بروقت ازالے سمیت دیگر سہولیات متعارف کرانے کے امکانات کا بھی جائزہ لیا گیا۔

کمشنر ذیشان لاشاری نے کہا کہ جدید ٹیکنالوجی سے استفادہ کرتے ہوئے پبلک ٹرانسپورٹ کو شہریوں کے لیے زیادہ آسان، شفاف، قابلِ اعتماد اور صارف دوست بنایا جائے۔ انہوں نے ہدایت کی کہ گرین بس سروس کی ڈیجیٹلائزیشن کے لیے قابلِ عمل تجاویز اور جامع منصوبہ تیار کیا جائے۔ اجلاس میں روٹس، آپریشنل امور، مسافروں کی مشکلات اور سروس کو مزید مؤثر بنانے کی تجاویز پر بھی غور کیا گیا۔

تصویر: بشکریہ ڈی جی پی آر بلوچستان