لورالائی: بلوچستان فوڈ اتھارٹی کی ڈی جی خان روڈ پر کارروائی، 4 ریسٹورنٹس کو جرمانے، 2 کو اصلاحی نوٹس

لورالائی: بلوچستان فوڈ اتھارٹی (بی ایف اے) کی زونل انسپیکشن ٹیم نے حفظانِ صحت کے اصولوں کی خلاف ورزی اور ناقص خوراک کی فراہمی کے خلاف کارروائی کرتے ہوئے نیشنل ہائی وے ڈی جی خان روڈ سمیت لورالائی شہر کے مختلف مضافاتی علاقوں میں قائم اشیائے خورونوش کے مراکز کا معائنہ کیا۔

بی ایف اے حکام کے مطابق کارروائی کے دوران 4 ریسٹورنٹس مالکان کو جرمانے عائد کیے گئے جبکہ معمولی نقائص پر 2 مراکز کو اصلاحی نوٹسز جاری کیے گئے۔ جرمانہ کیے گئے ریسٹورنٹس میں صفائی کی ابتر صورتحال، ورکرز کی ذاتی صفائی کا ناقص انتظام، کھلے کوڑے دان، ٹوٹے ہوئے کپ، حشرات کی موجودگی، گندے پانی کے ٹینک، خراب دہی اور خراب ٹماٹروں سمیت دیگر خلاف ورزیاں پائی گئیں۔

حکام نے واضح کیا کہ عوام کو معیاری اور صحت بخش خوراک کی فراہمی یقینی بنانے کے لیے خوراک کے مراکز کی باقاعدہ نگرانی اور خلاف ورزی کرنے والوں کے خلاف کارروائیاں جاری رہیں گی۔ تاجروں اور فوڈ بزنس آپریٹرز کو صفائی کے معیار اور فوڈ سیفٹی قوانین پر سختی سے عملدرآمد کی ہدایت بھی کی گئی۔

تصویر: بشکریہ ڈی جی پی آر بلوچستان