رکھنی تا بیکڑ روڈ ڈھائی ماہ میں مکمل کرنے کی یقین دہانی؛ کمشنر کوہِ سلیمان کا تعمیراتی کام تیز کرنے کا حکم

بارکھان/رکھنی: کمشنر کوہِ سلیمان ڈویژن مجیب الرحمٰن قمبرانی سے زیڈ کے بی کمپنی کے اونر حاجی محبت خان، ایکسیئن بی اینڈ آر نارتھ ڈیرہ بگٹی شمس الحق اور دیگر افسران نے ان کے دفتر میں ملاقات کی۔ ایڈیشنل کمشنر عبدالباسط بزدار بھی موجود تھے۔ ملاقات میں رکھنی تا بیکڑ زیرِ تعمیر شاہراہ سمیت جاری ترقیاتی منصوبوں پر تبادلۂ خیال کیا گیا۔

ملاقات میں منصوبے پر کام کی پیش رفت، مختلف حصوں کی صورتحال، تعمیراتی معیار، دستیاب مشینری و افرادی قوت اور بروقت تکمیل کا جائزہ لیا گیا اور حکام نے کمشنر کو تفصیلی بریفنگ دی۔

زیڈ کے بی کمپنی کے اونر حاجی محبت خان نے یقین دلایا کہ رکھنی تا بیکڑ روڈ منصوبہ آئندہ ڈھائی ماہ میں مکمل کرنے کے لیے تعمیراتی سرگرمیاں مزید تیز کی جائیں گی اور منصوبے پر مشینری اور افرادی قوت میں اضافہ کیا جا رہا ہے۔

کمشنر مجیب الرحمٰن قمبرانی نے کہا کہ یہ منصوبہ علاقے کی ترقی اور عوام کو بہتر سفری سہولیات کی فراہمی کے لیے انتہائی اہم ہے۔ انہوں نے ہدایت کی کہ کام کی رفتار تیز کی جائے اور تعمیراتی معیار پر کوئی سمجھوتہ نہ کیا جائے۔ انہوں نے کہا کہ وزیر اعلیٰ بلوچستان میر سرفراز بگٹی اور حکومتِ بلوچستان کی واضح پالیسی ہے کہ عوامی ترقیاتی منصوبے بروقت اور اعلیٰ معیار کے ساتھ مکمل ہوں؛ معیاری سڑکوں سے دور دراز علاقوں کے رابطے بہتر ہوں گے اور معاشی و تجارتی سرگرمیوں کو فروغ ملے گا۔

کمشنر نے منصوبے کی تکمیل میں حائل رکاوٹیں فوری دور کرنے کی ہدایت کی۔ ملاقات میں تعمیراتی کام کی مشکلات اور ان کے حل پر بھی گفتگو ہوئی۔ کمشنر نے واضح کیا کہ منصوبے کی رفتار اور معیار کی مسلسل نگرانی کی جائے گی تاکہ شاہراہ مقررہ مدت میں مکمل ہو سکے۔

تصویر: بشکریہ ڈی جی پی آر بلوچستان