کیچ میں 12 کرش پلانٹس رجسٹرڈ، غیر رجسٹرڈ پلانٹس کے خلاف کارروائی ہوگی: ڈپٹی کمشنر یاسر اقبال دشتی

تربت: ڈپٹی کمشنر کیچ یاسر اقبال دشتی کی زیرِ صدارت ضلع کیچ میں قائم کرش پلانٹس کے مالکان کا اجلاس منعقد ہوا، جس میں کرش پلانٹس کی رجسٹریشن، ماحولیاتی قوانین پر عملدرآمد، آلودگی کے تدارک اور کارپوریٹ سماجی ذمہ داری (CSR) کے تحت عوامی فلاح کے اقدامات کا جائزہ لیا گیا۔

اجلاس میں اسسٹنٹ کمشنر تربت محمد حنیف کبزئی، اسسٹنٹ کمشنر بلیدہ ابوبکر میروانی، ڈپٹی چیئرمین ضلع کونسل کیچ میر باہڈ جمیل دشتی، چیف آفیسر میونسپل کارپوریشن تربت شعیب ناصر، ڈپٹی ڈائریکٹر محکمہ ماحولیات طارق علی اور کرش پلانٹس کے مالکان نے شرکت کی۔

طارق علی نے بریفنگ میں بتایا کہ محکمہ ماحولیات کے ریکارڈ کے مطابق ضلع کیچ میں 12 کرش پلانٹس رجسٹرڈ ہیں، جبکہ بعض پلانٹس تاحال غیر رجسٹرڈ ہیں۔

ڈپٹی کمشنر نے کہا کہ ماحولیاتی تحفظ، شہریوں کی صحت اور صاف ماحول ضلعی انتظامیہ کی ترجیحات میں شامل ہیں۔ انہوں نے مالکان کو گرد و غبار اور دیگر ماحولیاتی اثرات کے تدارک کے لیے قوانین پر مکمل عملدرآمد کی ہدایت کی اور واضح کیا کہ تمام پلانٹس کی قانونی حیثیت اور رجسٹریشن کا جائزہ لیا جائے گا، اور غیر رجسٹرڈ یا خلاف ورزی کرنے والے پلانٹس کے خلاف قانونی کارروائی ہوگی۔

انہوں نے مالکان پر زور دیا کہ وہ CSR کے تحت ایمبولینسز کی مرمت و بحالی، سرکاری اسکولوں کی تعمیر و مرمت، مستحق طلبہ کے لیے اسکالرشپس، سرکاری ہسپتالوں کی بہتری اور دیگر عوامی منصوبوں میں تعاون کریں۔ اجلاس کے اختتام پر مالکان نے ماحولیاتی قوانین پر عملدرآمد اور فلاحی منصوبوں میں تعاون کی یقین دہانی کرائی۔

تصویر: بشکریہ ڈی جی پی آر بلوچستان