کچھی سبی بائی پاس پر پی ٹی اے اور ٹریفک پولیس کی کارروائی، 26 گاڑیوں کے چالان، 7 بند

ڈھاڈر: صوبائی سیکرٹری ٹرانسپورٹ بلوچستان محمد حیات کاکڑ اور سیکرٹری پروونشل ٹرانسپورٹ اتھارٹی (PTA) بلوچستان وحید شریف عمرانی کی ہدایت اور ایس ایس پی کچھی غلام مرتضیٰ بھٹو کی زیر نگرانی پی ٹی اے بلوچستان اور ٹریفک پولیس کچھی نے کچھی سبی بائی پاس پر بغیر پرمٹ، غیر قانونی روٹ کے استعمال، اوورلوڈنگ اور ٹریفک قوانین کی خلاف ورزی کرنے والی گاڑیوں کے خلاف کارروائی کی۔

کارروائی کے دوران مختلف گاڑیوں کے کاغذات، روٹ پرمٹ اور دیگر ضروری دستاویزات کی جانچ پڑتال کی گئی۔ بغیر پرمٹ اور اوورلوڈنگ کی خلاف ورزی پر 26 گاڑیوں کے چالان کیے گئے، 7 گاڑیوں کو بند کر دیا گیا، جبکہ متعدد گاڑیوں کے مالکان اور ڈرائیوروں کو آئندہ قوانین کی خلاف ورزی سے گریز کرنے کی وارننگ بھی جاری کی گئی۔

حکام کے مطابق بعض مسافر گاڑیوں، ٹرکوں اور دیگر بھاری گاڑیوں میں مقررہ حد سے زائد لوڈنگ اور غیر قانونی روٹ کا استعمال بھی پایا گیا، جس پر متعلقہ قوانین کے تحت کارروائی عمل میں لائی گئی۔ کارروائی ڈی ایس پی ٹریفک پولیس معاذ اللہ، اسسٹنٹ پی ٹی اے جان محمد اور ٹریفک پولیس کچھی پر مشتمل ٹیم نے کی، جس نے موقع پر گاڑیوں کے روٹ پرمٹ، رجسٹریشن، فٹنس اور دیگر دستاویزات کا تفصیلی معائنہ کیا۔

ٹریفک پولیس اور پی ٹی اے بلوچستان کے حکام نے کہا کہ مسافر اور مال بردار گاڑیوں کے مالکان و ڈرائیورز ٹریفک قوانین اور ٹرانسپورٹ کے ضوابط کی پابندی کریں تاکہ سڑکوں پر حادثات کی روک تھام اور مسافروں و دیگر شہریوں کی حفاظت یقینی بنائی جا سکے۔ حکام نے واضح کیا کہ بغیر روٹ پرمٹ گاڑی چلانے، مقررہ حد سے زائد سامان لادنے اور غیر قانونی روٹ استعمال کرنے سمیت دیگر خلاف ورزیوں کے خلاف کارروائیاں جاری رہیں گی۔

تصویر: بشکریہ ڈی جی پی آر بلوچستان