کمشنر لسبیلہ سائرہ عطا کا ورکرز ویلفیئر اسکول کا دورہ، آلودگی پر حب کی 6 صنعتی فیکٹریاں سیل

حب: کمشنر لسبیلہ ڈویژن سائرہ عطا نے انڈسٹریل زون میں واقع ورکرز ویلفیئر اسکول کا دورہ کیا، تدریسی سرگرمیوں کا جائزہ لیا اور طلبہ و اساتذہ سے ملاقات کر کے اسکول کے مسائل معلوم کیے۔ اس موقع پر اساتذہ اور طلبہ نے شکایت کی کہ صنعتی آلودگی سے تدریسی سرگرمیاں متاثر ہو رہی ہیں۔

کمشنر نے مسئلے کا نوٹس لیتے ہوئے خود فیکٹری کا دورہ کیا اور حقائق جاننے کے بعد محکمہ تحفظ ماحولیات کے افسران کو فوری طلب کر کے ماحولیاتی قوانین پر عمل نہ کرنے والی ضلع حب کی 6 صنعتی فیکٹریوں کو سیل کرنے کا حکم دیا۔ انوائرمنٹل پروٹیکشن ایجنسی ایکٹ 2012 پر عملدرآمد کی ایڈوائزری پر اسسٹنٹ کمشنر حب مہیم خان گچکی اور ڈپٹی ڈائریکٹر انوائرمنٹ طارق نے ماحولیاتی ٹیم کے ہمراہ چھ صنعتی یونٹس سیل کر دیے۔

سائرہ عطا نے کہا کہ ماحولیاتی تحفظ ایکٹ 2012 کی خلاف ورزی پر سخت کارروائی ہوگی، ای پی اے افسران قوانین پر عملدرآمد یقینی بنائیں اور فرائض میں غفلت برتنے والی انسپکشن ٹیموں کے خلاف بھی کارروائی کی جائے گی۔ ڈپٹی ڈائریکٹر انوائرمنٹ نے بتایا کہ ای پی اے ریجنل آفس کی جانب سے 72 کیسز انوائرمنٹل ٹریبونل میں زیر سماعت ہیں۔

تصویر: بشکریہ ڈی جی پی آر بلوچستان