چمن میں 7 روزہ انسداد پولیو مہم شروع، 83 ہزار بچوں کو قطرے پلانے کا ہدف، داخلی راستوں پر بھی ٹیمیں

چمن: بلوچستان بھر کی طرح ضلع چمن میں بھی 7 روزہ انسدادِ پولیو مہم کا باقاعدہ آغاز کر دیا گیا۔ ڈپٹی کمشنر چمن حبیب احمد بنگلزئی نے اپنے دفتر میں بچوں کو پولیو سے بچاؤ کے قطرے پلا کر مہم کا افتتاح کیا۔ اس موقع پر سماجی رہنما محمد علی اچکزئی اور ضلعی پولیو افسر محمد اشرف اچکزئی بھی موجود تھے۔

ضلعی انتظامیہ کے مطابق مہم کے دوران ضلع چمن میں 83 ہزار بچوں کو قطرے پلانے کا ہدف مقرر کیا گیا ہے۔ ٹیمیں گھر گھر جا کر پانچ سال سے کم عمر بچوں کو قطرے پلائیں گی، جبکہ چمن شہر کے داخلی و خارجی راستوں اور اہم چیک پوسٹوں پر بھی ٹیمیں تعینات رہیں گی جہاں گاڑیوں، موٹر سائیکلوں اور پیدل سفر کرنے والے بچوں کو بھی قطرے پلائے جائیں گے۔

ڈپٹی کمشنر نے والدین اور شہریوں سے اپیل کی کہ پولیو ٹیموں سے بھرپور تعاون کریں اور ہر مہم میں اپنے بچوں کو قطرے ضرور پلوائیں تاکہ وہ عمر بھر کی معذوری سے محفوظ رہیں۔ انہوں نے پولیو کے خاتمے کے لیے ضلعی انتظامیہ، محکمہ صحت، پولیو ٹیموں، والدین اور معاشرے کے تمام طبقات کے مشترکہ تعاون کو ناگزیر قرار دیا۔

تصویر: بشکریہ ڈی جی پی آر بلوچستان