دُکی: ڈپٹی کمشنر فضل الرحمن کبدانی کی زیرِ صدارت آئندہ پولیو مہم کی تیاریوں کا اجلاس

دُکی: ڈپٹی کمشنر دُکی فضل الرحمن کبدانی کی زیرِ صدارت آئندہ پولیو مہم کی تیاریوں، انتظامات اور مؤثر حکمتِ عملی کا جائزہ لینے کے لیے اہم اجلاس منعقد ہوا۔

اجلاس میں ڈی ایم پی پی ایچ آئی قاہر خان درانی، ڈسٹرکٹ پولیو آفیسر ڈاکٹر عبداللہ جان، این اسٹاپ ڈاکٹر عزیز اللہ، ایم اینڈ ای آفیسر ای پی آئی پیر محمد، سی سی او سعید احمد ناصر سمیت متعلقہ افسران اور دیگر ذمہ داران نے شرکت کی۔

اجلاس میں زیرِ غور امور

اجلاس کے دوران مائیکرو پلاننگ، پولیو ٹیموں کی تشکیل و تربیت، بچوں تک رسائی، حساس علاقوں کی نشاندہی، مانیٹرنگ اور مہم کو مؤثر بنانے کے لیے ضروری اقدامات کا تفصیلی جائزہ لیا گیا۔

شرکاء نے مہم کے دوران درپیش ممکنہ چیلنجز اور ان کے بروقت تدارک کے حوالے سے بھی تبادلہ خیال کیا۔

ڈپٹی کمشنر کی ہدایات

ڈپٹی کمشنر فضل الرحمن کبدانی نے ہدایت کی کہ پولیو مہم کی کامیابی کے لیے تمام دستیاب وسائل بروئے کار لائے جائیں اور تمام متعلقہ محکمے و ادارے باہمی رابطے اور مؤثر کوآرڈینیشن کے ساتھ اپنی ذمہ داریاں ادا کریں۔

انہوں نے کہا کہ پانچ سال سے کم عمر کوئی بھی بچہ پولیو سے بچاؤ کے قطرے پینے سے محروم نہیں رہنا چاہیے، اس مقصد کے لیے گھر گھر رسائی، انکاری خاندانوں کی مؤثر کاؤنسلنگ اور رہ جانے والے بچوں کی نشاندہی پر خصوصی توجہ دی جائے۔

ڈپٹی کمشنر نے پولیو ٹیموں کی تربیت اور فیلڈ میں نگرانی کے نظام کو مزید مؤثر بنانے کی ہدایت کرتے ہوئے کہا کہ پولیو کا مکمل خاتمہ مشترکہ قومی ذمہ داری ہے اور اس مقصد کے حصول کے لیے تمام متعلقہ اداروں کو بھرپور کردار ادا کرنا ہوگا۔

اجلاس میں آئندہ پولیو مہم کو کامیاب بنانے، بچوں کو موذی مرض سے محفوظ رکھنے اور ضلع دُکی میں پولیو کے خاتمے کے لیے تمام ضروری اقدامات یقینی بنانے پر اتفاق کیا گیا۔

تصویر: بشکریہ ڈی جی پی آر بلوچستان