خضدار: ستمبر کی پولیو مہم میں 49 یونین کونسلز کے 1 لاکھ 80 ہزار سے زائد بچوں کو قطرے پلانے کا ہدف

خضدار: پولیو مہم برائے ستمبر 2026 کے سلسلے میں ڈسٹرکٹ پولیو ایریڈیکیشن کمیٹی (DPEC) کا اہم اجلاس ڈپٹی کمشنر خضدار عبدالرزاق ساسولی کی زیرِ صدارت ڈی سی کانفرنس روم میں منعقد ہوا۔

اجلاس میں چیف آفیسر خضدار وڈیرہ صالح جاموٹ، ڈی ایچ او خضدار ڈاکٹر عبدالحمید لہڑی، اسسٹنٹ کمشنر نال عبداللہ، ایگزیکٹو آفیسرز انجینئر سلیم رزاق عمرانی، انجینئر لیاقت علی، ڈاکٹر انور زہری، ڈسٹرکٹ ایجوکیشن آفیسر خضدار، ڈی ای اوز، ڈی ای او سی کے ممبران، پارٹنر آرگنائزیشنز اور متعلقہ محکموں کے دیگر افسران نے شرکت کی۔

اجلاس میں ستمبر کی پولیو مہم کی تفصیلی حکمتِ عملی اور تیاریوں کا جائزہ لیا گیا۔ بریفنگ میں بتایا گیا کہ مہم ضلع خضدار کی تمام 49 یونین کونسلز میں چلائی جائے گی، جس کے دوران پانچ سال تک کی عمر کے 1 لاکھ 80 ہزار سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔

کم کارکردگی کا مظاہرہ کرنے والی یونین کونسلز (Low Performing UCs) کی بھی نشاندہی کی گئی، اور ان یوسیز میں کوریج بہتر بنانے، رہ جانے والے بچوں تک رسائی اور ٹیموں کی کارکردگی مؤثر بنانے کے لیے خصوصی اقدامات اور لائحہ عمل طے کیا گیا۔ اجلاس میں مہم کی سکیورٹی صورتحال کا بھی تفصیلی جائزہ لیا گیا اور فیلڈ ٹیموں، ویکسینیٹرز اور دیگر عملے کو فول پروف سکیورٹی فراہم کرنے کے لیے انتظامات مزید بہتر بنانے پر زور دیا گیا۔

ڈپٹی کمشنر عبدالرزاق ساسولی نے کہا کہ «پولیو مہم کی کامیابی کے لیے تمام دستیاب وسائل بروئے کار لائے جائیں۔ محکمے اور پارٹنر ادارے باہمی رابطہ و تعاون کو مزید بہتر بنائیں تاکہ ضلع بھر میں کوئی بھی بچہ پولیو ویکسین سے محروم نہ رہے۔»

انہوں نے تمام افسران کو ہدایت کی کہ Low Performing UCs پر خصوصی توجہ دی جائے اور مہم کے دوران کسی قسم کی غفلت برداشت نہیں کی جائے گی۔ انہوں نے کہا کہ یہ ایک قومی ذمہ داری اور نئی نسل کو ایک مرض سے بچانے کا معاملہ ہے، لہٰذا سب جذبے کے تحت خدمت سرانجام دیں تاکہ پولیو جیسے مرض کا مستقل طور پر خاتمہ کیا جا سکے۔

تصویر: بشکریہ ڈی جی پی آر بلوچستان