حب سیف سٹی پراجیکٹ: کمشنر لسبیلہ سائرہ عطاء کا سرویلنس سینٹر کا دورہ، شہر کو کرائم فری بنانے کا عزم

حب: کمشنر لسبیلہ ڈویژن سائرہ عطاء نے کہا ہے کہ ضلع حب بلوچستان کی صنعتی ترقی میں ریڑھ کی ہڈی کی حیثیت رکھتا ہے۔ کوئٹہ میں رول آؤٹ کے بعد حکومت بلوچستان نے صنعتی ضلع حب میں ڈیجیٹل نگرانی کا بنیادی ڈھانچہ نصب کرنے کے لیے تکنیکی اقدامات کیے ہیں، اور سیف سٹی پراجیکٹ کی ہائی ریزولوشن AI مانیٹرنگ سے اسٹریٹ کرائم روکنے میں مدد ملی ہے۔

یہ بات انہوں نے پیر کے روز سیف سٹی پراجیکٹ ضلع حب کے سرویلنس سینٹر کے دورے کے موقع پر حکام سے گفتگو میں کہی۔ اے ایس پی عدنان نے کمشنر کو سرویلنس کیمروں کے ذریعے شہر کی سیکیورٹی مانیٹرنگ کے اقدامات سے آگاہ کیا، جبکہ کمشنر نے سرویلنس سینٹر کے مختلف سیکشنز کا دورہ کیا اور شہر کے مختلف مقامات پر نصب نظام کی آپریشنل سرگرمیوں کا جائزہ لیا۔

سائرہ عطاء نے کہا کہ وزیر اعلیٰ بلوچستان سرفراز بگٹی اور چیف سیکرٹری شکیل قادر خان کی ہدایت پر سرمایہ کاروں کو مستحکم ماحول فراہم کرنے کے لیے جدید حفاظتی انفراسٹرکچر کا قیام تیزی سے پھیلتے حب شہر کو کرائم فری زون بنانے میں اہم کردار ادا کرے گا۔

کمشنر کو بتایا گیا کہ سندھ بلوچستان سرحدی پٹی پر واقع ضلع حب ایک اہم صنعتی مرکز اور ٹرانزٹ زون ہے۔ کمشنر کے مطابق سیف سٹی پراجیکٹ کو حب سمیت صوبے کے اسٹریٹجک اضلاع تک پھیلایا گیا ہے، جس کا مقصد قانون کے نفاذ کو بہتر بنانا، سرحدی پٹی پر اسمگلنگ کی روک تھام اور اسمارٹ ٹریفک مینجمنٹ ہے، جبکہ خصوصی آئی ٹی اور سسٹم مینیجرز ڈیٹا لنکس اور کمپیوٹر کی مدد سے ہنگامی واقعات میں پولیس کے فوری ردعمل کو ممکن بناتے ہیں۔

تصویر: بشکریہ ڈی جی پی آر بلوچستان