حاجی محمد خان لہڑی کی ڈیرہ مراد جمالی میں وفود سے ملاقاتیں: ’’وطن کے چپے چپے کی حفاظت قومی ذمہ داری ہے‘‘

نصیرآباد: صوبائی پارلیمانی سیکرٹری برائے ایکسائز اینڈ ٹیکسیشن و رکن صوبائی اسمبلی حاجی محمد خان لہڑی نے کہا ہے کہ پاکستان لا الٰہ الا اللہ کے نام پر معرضِ وجود میں آیا اور اس کی آزادی ہمیں ماہِ مقدس رمضان المبارک میں 14 اگست کو نصیب ہوئی۔ پاکستان ایک آزاد، خودمختار اور اسلامی ریاست ہے جس کے چپے چپے کی حفاظت ہم سب کی قومی ذمہ داری ہے۔

انہوں نے ان خیالات کا اظہار لہڑی ہاؤس ڈیرہ مراد جمالی میں مختلف وفود اور عوامی نمائندوں سے ملاقات کے دوران کیا۔ انہوں نے کہا کہ قیامِ پاکستان کے بعد ہمیں غلامی کی زنجیروں سے نجات ملی اور آج ہم اپنی مذہبی، سماجی اور قومی رسومات مکمل آزادی سے ادا کر رہے ہیں، یہ آزادی بزرگوں کی بے مثال جدوجہد، لازوال قربانیوں اور شہداء کے خون کا ثمر ہے۔

حاجی محمد خان لہڑی نے کہا کہ 14 اگست قومی عزم کی تجدید کا موقع ہے، اختلافات بالائے طاق رکھ کر قومی یکجہتی، بھائی چارے اور حب الوطنی کو فروغ دینا چاہیے۔ نوجوان ملک کا روشن مستقبل ہیں، انہیں تعلیم، ہنر اور مثبت سرگرمیوں کی جانب راغب کر کے مضبوط پاکستان کی بنیاد مزید مستحکم کی جا سکتی ہے۔

انہوں نے کہا کہ بلوچستان سمیت ملک کے تمام علاقوں کی ترقی اور عوام کو بنیادی سہولیات کی فراہمی اولین ترجیحات میں شامل ہے۔ انہوں نے اہلِ وطن کو 79ویں جشنِ آزادی کی مبارکباد دیتے ہوئے کہا کہ ہمیں اس عہد کے ساتھ یومِ آزادی منانا چاہیے کہ پاکستان کی سلامتی، خودمختاری، ترقی اور خوشحالی کے لیے کسی قربانی سے دریغ نہیں کریں گے۔

تصویر: بشکریہ ڈی جی پی آر بلوچستان