استا محمد میں خواتین کی کھلی کچہری: ڈپٹی کمشنر محمد رمضان پلال نے صفائی، پانی، گیس اور تعلیم کے مسائل سنے

استا محمد: ڈپٹی کمشنر استا محمد محمد رمضان پلال کی زیرِ صدارت گورنمنٹ گرلز ہائی اسکول استا محمد میں خواتین کی کھلی کچہری منعقد کی گئی، جس میں کثیر تعداد میں خواتین نے شرکت کی اور اپنے مسائل براہِ راست ڈپٹی کمشنر اور متعلقہ محکموں کے افسران کے سامنے پیش کیے۔

کھلی کچہری وزیر اعلیٰ بلوچستان کی ہدایات کی روشنی میں منعقد کی گئی۔ اس میں اسسٹنٹ کمشنر استا محمد ماریہ شمون، ڈی ایس پی داؤد کھوسہ، ڈسٹرکٹ آفیسر ایجوکیشن (فیمیل) قندیل، ڈسٹرکٹ ہیلتھ آفیسر ڈاکٹر امیر علی، پرنسپل گورنمنٹ گرلز کالج محترمہ نگہت جان، پرنسپل گورنمنٹ بوائز کالج عبیداللہ سمیت تمام متعلقہ لائن ڈیپارٹمنٹس کے نمائندوں نے شرکت کی۔

خواتین نے شہر کی صفائی، بینظیر انکم سپورٹ پروگرام (BISP)، سیکیورٹی، پانی کی فراہمی، گورنمنٹ گرلز ہائی اسکول کی عمارت کی بحالی، گرلز لائبریری، گرلز کالج کی عمارت، گیس کی عدم دستیابی، اسکول کے سامنے ٹریفک و چھٹی کے مسائل اور تجاوزات سمیت مختلف عوامی مسائل کی نشاندہی کی۔

ڈپٹی کمشنر محمد رمضان پلال نے مسائل غور سے سنے اور موقع پر موجود افسران کو ہدایت کی کہ ان کے حل کے لیے فوری اور مؤثر اقدامات کیے جائیں اور پیش رفت سے ضلعی انتظامیہ کو آگاہ کیا جائے۔ کھلی کچہری کا مقصد خواتین کو مسائل کے حل کے لیے ضلعی انتظامیہ اور سرکاری محکموں تک براہِ راست رسائی دینا اور عوامی شکایات کا بروقت ازالہ یقینی بنانا ہے۔

تصویر: بشکریہ ڈی جی پی آر بلوچستان