آئی ایل او کے ڈائریکٹر جنرل گلبرٹ ہونگبو کا گڈانی شپ ری سائیکلنگ یارڈ کا دورہ، محنت کشوں کی سلامتی پر بریفنگ

گڈانی: عالمی ادارہ محنت (ILO) کے ڈائریکٹر جنرل گلبرٹ ہونگبو نے بدھ کے روز گڈانی شپ ری سائیکلنگ یارڈ کا دورہ کیا، جہاں صوبائی وزیر منصوبہ بندی و ترقی میر ظہور احمد بلیدی اور ایڈیشنل چیف سیکریٹری ترقیات زاہد سلیم نے ان کا استقبال کیا۔

ایڈیشنل چیف سیکریٹری ترقیات زاہد سلیم نے آئی ایل او کے ڈائریکٹر جنرل کو گڈانی شپ ری سائیکلنگ یارڈ، صنعتی سرگرمیوں، محنت کشوں کی فلاح و بہبود، پیشہ ورانہ صحت و سلامتی، محفوظ ماحولِ کار اور ماحولیاتی تحفظ سے متعلق امور پر تفصیلی بریفنگ دی۔ انہوں نے گڈانی میں صنعتی ترقی، شپ ری سائیکلنگ کے شعبے کی بہتری، محنت کشوں کی فلاح و بہبود اور محفوظ و ماحول دوست ماحولِ کار کے فروغ کے لیے حکومت بلوچستان کے اقدامات سے آگاہ کیا۔

محنت کشوں کی صحت و سلامتی حکومت کی ترجیح

زاہد سلیم نے کہا کہ حکومت بلوچستان گڈانی شپ ری سائیکلنگ سیکٹر کو محفوظ، ماحول دوست اور پائیدار صنعتی سرگرمیوں کے مرکز کے طور پر ترقی دینے کے لیے متعلقہ اداروں اور شراکت داروں کے ساتھ تعاون اور رابطہ کاری جاری رکھے ہوئے ہے۔

انہوں نے کہا کہ شپ ری سائیکلنگ کے شعبے سے وابستہ محنت کشوں کی صحت، سلامتی اور فلاح و بہبود حکومت کی ترجیحات میں شامل ہے، جبکہ گڈانی میں بنیادی ڈھانچے کی بہتری، محفوظ ورکنگ کنڈیشنز اور ماحول دوست صنعتی طریقہ کار کے فروغ پر بھی توجہ دی جا رہی ہے۔

ان کے مطابق عالمی ادارہ محنت کے ساتھ تعاون، تکنیکی معاونت اور تجربات کا تبادلہ گڈانی شپ ری سائیکلنگ سیکٹر میں پیشہ ورانہ صحت و سلامتی، محنت کشوں کے حقوق اور پائیدار صنعتی طریقہ کار کو مزید مستحکم کرنے میں معاون ثابت ہو سکتا ہے۔ انہوں نے کہا کہ حکومت بلوچستان متعلقہ اداروں اور شراکت داروں کے ساتھ مل کر بین الاقوامی معیارات کے مطابق محنت کشوں کے لیے محفوظ اور باوقار ماحولِ کار کی فراہمی کے لیے اقدامات کر رہی ہے۔

یارڈ میں صنعتی سرگرمیوں کا جائزہ

گلبرٹ ہونگبو نے یارڈ میں جاری صنعتی سرگرمیوں کا جائزہ لیا اور وہاں کام کرنے والے محنت کشوں کے ماحول، صحت و سلامتی اور دیگر متعلقہ امور سے آگاہی حاصل کی۔ دورے کے دوران محفوظ اور ماحول دوست شپ ری سائیکلنگ طریقہ کار، محنت کشوں کے حقوق، پیشہ ورانہ صحت و سلامتی اور صنعتی سرگرمیوں کو پائیدار بنیادوں پر فروغ دینے کے حوالے سے امور کا جائزہ لیا گیا۔

میر ظہور احمد بلیدی اور زاہد سلیم نے آئی ایل او کے ڈائریکٹر جنرل کے ساتھ یارڈ کا دورہ بھی کیا۔ زاہد سلیم نے اس دورے کو محفوظ، ذمہ دار اور پائیدار صنعتی ترقی کے لیے تعاون کو مزید فروغ دینے کا اہم موقع قرار دیا۔

تصویر: بشکریہ ڈی جی پی آر بلوچستان