قلعہ عبداللہ: گلستان میں انسدادِ بھنگ مہم، مزید 195 ایکڑ اراضی بھنگ سے پاک

قلعہ عبداللہ: محکمہ ایکسائز اینڈ ٹیکسیشن نے ضلع قلعہ عبداللہ کی تحصیل گلستان میں انسدادِ بھنگ مہم 2026 کے تحت بھنگ کی کاشت کے خاتمے کے لیے مشترکہ کارروائی کے دوران مزید 195 ایکڑ اراضی کو بھنگ کی کاشت سے پاک کر دیا گیا، جس کے بعد مہم کے آغاز سے اب تک بھنگ کی کاشت ختم کی گئی اراضی کا مجموعی رقبہ 1,141 ایکڑ تک پہنچ گیا ہے۔

محکمے کے افسران کا کہنا تھا کہ 24 اکتوبر کو تحصیل گلستان کے علاقوں قدیل سیگئی اور عبدالرحمان زئی میں ضلعی انتظامیہ قلعہ عبداللہ نے مشترکہ کارروائی کی۔ کارروائی میں اسسٹنٹ کمشنر گلستان، اسسٹنٹ ڈائریکٹر اے این ایف، ایف سی کے کیپٹن شاویز (77 ونگ)، ڈی ایس پی گلستان، محکمہ ایکسائز اینڈ ٹیکسیشن سمیت دیگر قانون نافذ کرنے والے اداروں نے حصہ لیا۔

مشترکہ ٹیموں میں پولیس، ایف سی، اینٹی نارکوٹکس فورس (اے این ایف)، محکمہ ایکسائز اینڈ ٹیکسیشن اور ضلعی انتظامیہ کے اہلکار شامل تھے۔ ان میں 92 ایکڑ اراضی پر دستی طریقے سے، 62 ایکڑ پر ٹریکٹر کے ذریعے اور 24 ایکڑ پر ویڈ کٹرز کی مدد سے بھنگ کو تلف کیا گیا، جبکہ 17 ایکڑ رقبے پر پانی کی قلت کے باعث بھنگ کی کاشت ختم کی گئی۔

حکام کے مطابق انسدادِ بھنگ مہم 2026 کا سلسلہ بھنگ کی کاشت کے مکمل خاتمے تک جاری رہے گا، جس کا مقصد علاقے میں منشیات کی کاشت کی روک تھام اور اس کے خاتمے کے لیے مشترکہ ادارہ جاتی اقدامات کو مؤثر بنانا ہے۔