یومِ سیاہ کشمیر: صدر زرداری اور وزیراعظم شہباز شریف کا عالمی برادری سے کردار ادا کرنے کا مطالبہ

اسلام آباد: صدر مملکت آصف علی زرداری اور وزیراعظم شہباز شریف نے یومِ سیاہ کشمیر کے موقع پر عالمی برادری بالخصوص اقوام متحدہ اور بین الاقوامی انسانی حقوق کی تنظیموں سے مطالبہ کیا ہے کہ وہ بھارتی غیرقانونی زیر تسلط جموں و کشمیر میں انسانی حقوق کی صورتحال کا سنجیدگی سے نوٹس لیں اور تنازعہ جموں و کشمیر کے منصفانہ، پرامن اور پائیدار حل کے لیے موثر کردار ادا کریں۔

جنوبی ایشیا میں پائیدار امن و استحکام کا قیام جموں و کشمیر کے تنازعے کے منصفانہ اور پرامن حل کے بغیر ممکن نہیں۔ یومِ سیاہ کشمیر آج 27 اکتوبر کو منایا جا رہا ہے۔

صدر مملکت کا پیغام

صدر آصف علی زرداری نے اپنے پیغام میں کہا کہ 27 اکتوبر 1947 کو بھارتی افواج سرینگر میں اتریں، جس کے بعد جموں و کشمیر کی تاریخ میں ایک طویل اور دردناک باب کا آغاز ہوا۔ یہ دن کشمیری عوام کی دیرینہ امنگوں اور حقِ خودارادیت کے لیے ان کی جدوجہد کے حوالے سے پاکستان کی بھرپور تائید کا اعادہ ہے۔

انہوں نے کہا کہ گزشتہ آٹھ دہائیوں سے بھارتی غیرقانونی زیر تسلط جموں و کشمیر کے عوام تشدد، جبر اور بنیادی حقوق کی سنگین خلاف ورزیوں کا شکار ہیں۔ بنیادی آزادیوں پر مسلسل پابندیاں، فوجی موجودگی میں نمایاں اضافہ، گرفتاریاں اور انسانی حقوق کی خلاف ورزیوں کی رپورٹس باعثِ تشویش ہیں۔

صدر نے کہا کہ 5 اگست 2019 کے بعد بھارت نے یکطرفہ طور پر جموں و کشمیر کی آئینی اور قانونی حیثیت تبدیل کرنے کی کوشش کی، جس کے بعد صورتحال مزید بگڑ گئی۔ انہوں نے کہا کہ پاکستان بھارتی غیرقانونی زیر تسلط جموں و کشمیر کے عوام کی غیر متزلزل اخلاقی، سفارتی اور سیاسی حمایت جاری رکھے گا۔

وزیراعظم کا پیغام

وزیراعظم شہباز شریف نے کہا کہ آج کا دن 79 برس قبل بھارتی افواج کے سری نگر میں داخلے سے شروع ہونے والے المناک باب کی یاد دلاتا ہے۔ اس روز سے اب تک جموں و کشمیر کے عوام کو اقوامِ متحدہ کی سلامتی کونسل کی متعلقہ قراردادوں میں تسلیم شدہ حقِ خودارادیت سے محروم رکھا گیا ہے۔

انہوں نے کہا کہ کشمیری سیاسی رہنماؤں، کارکنوں اور انسانی حقوق کے محافظوں کی طویل قید باعثِ تشویش ہے۔ بھارت کشمیری عوام کے جائز سیاسی اظہار کو دبانے کی کوششیں جاری رکھے ہوئے ہے۔ جبر و استبداد کے ذریعے کشمیری عوام کی امنگوں کو دبایا نہیں جا سکتا۔

وزیراعظم نے کہا کہ حکومت اور پاکستان کی عوام بھارت کے غیر قانونی زیرِ قبضہ جموں و کشمیر کے عوام کے ساتھ غیر متزلزل یکجہتی کا اعادہ کرتی ہیں اور ہر قومی و بین الاقوامی فورم پر ان کے جائز حقوق کے لیے آواز بلند کرتی رہیں گی۔ انہوں نے دعا کی کہ کشمیری عوام کو پائیدار امن، وقار اور سلامتی پر مبنی مستقبل نصیب ہو۔