ژوب میں صوبائی محتسب کی ہدایت پر کھلی کچہری، شہریوں کی شکایات سنی گئیں

ژوب: صوبائی محتسب کی ہدایت پر ڈویژنل ڈائریکٹوریٹ کے زیر اہتمام کھلی کچہری کا انعقاد کیا گیا، جس میں صوبائی محتسب کے ڈویژنل ڈائریکٹر شیخ عصمت اللہ مندوخیل، مختلف محکموں کے افسران، ڈی ای او شیخ موسیٰ خان مندوخیل، ایف سی کے میجر محمد ہاشم، سپرنٹنڈنٹ جیل عبدالستار مندوخیل، محکمہ جنگلات کے افسر سلطان محمود لعون اور شہریوں نے بڑی تعداد میں شرکت کی۔

شہریوں کی شکایات

کھلی کچہری میں شہریوں نے مختلف محکموں کے خلاف شکایات کے انبار لگا دیے۔ شہریوں نے ضلع کونسل میں مبینہ کرپشن اور کمیشن، ڈی ایچ کیو ہسپتال میں صحت کی سہولتوں اور ادویات کی عدم دستیابی، شہر میں پانی کی قلت، محکمہ پی ایچ سی کے منصوبوں، محکمہ خزانہ میں بھرتیوں، وانا، سمبازہ اور قمرالدین کاریز شاہراہ کی عدم تعمیر جبکہ بجلی کی طویل اور غیر اعلانیہ لوڈشیڈنگ کے خلاف شکایات کرتے ہوئے ڈویژنل ڈائریکٹر کو تحریری درخواستیں پیش کیں۔

ڈویژنل ڈائریکٹر شیخ عصمت اللہ مندوخیل نے شہریوں کی شکایات غور سے سنیں اور یقین دہانی کرائی کہ موصول ہونے والی درخواستوں پر قانون اور متعلقہ قواعد کے مطابق کارروائی اور ان کے ازالے کے لیے اقدامات کیے جائیں گے۔

ادارے کا مقصد

انہوں نے کہا کہ صوبائی محتسب کا ادارہ عوام کو سرکاری محکموں کی بدانتظامی، اختیارات کے ناجائز استعمال، غیر ضروری تاخیر اور دیگر انتظامی بے ضابطگیوں کے خلاف شکایات کے ازالے کا مؤثر فورم فراہم کرتا ہے۔ ادارے کا مقصد شہریوں کو مفت اور فوری انصاف کی فراہمی، سرکاری محکموں کی کارکردگی میں بہتری اور عوامی مسائل کا شفاف انداز میں حل یقینی بنانا ہے۔

کھلی کچہریوں کے انعقاد سے شہریوں کو اپنی شکایات براہِ راست حکام تک پہنچانے کا موقع ملتا ہے، جبکہ متعلقہ محکموں کو مسائل کے حل کے لیے جواب دہ بنایا جا سکتا ہے۔

تصویر: بشکریہ ڈی جی پی آر بلوچستان