مریم نواز نے سوشل سکیورٹی موبائل ہیلتھ پروگرام کا افتتاح کر دیا، مارچ 2027 تک مزید 12 اضلاع تک توسیع کا ہدف

لاہور (اعتماد ڈیسک): وزیراعلیٰ پنجاب مریم نواز شریف نے سوشل سکیورٹی موبائل ہیلتھ پروگرام کا افتتاح کر دیا، جس کے تحت رجسٹرڈ محنت کشوں کو کام کی جگہ پر اور ان کے اہل خانہ کو گھر پر طبی سہولیات ملیں گی۔ وزیراعلیٰ آفس کے مطابق مارچ 2027 تک پروگرام کو پنجاب کے مزید 12 اضلاع اور شہروں تک پھیلانے کا ہدف ہے۔

جن شہروں تک پروگرام پھیلایا جائے گا ان میں گوجرانوالہ، سیالکوٹ، گجرات، فیصل آباد، سرگودھا، ساہیوال، ملتان، مظفرگڑھ، ڈیرہ غازی خان، بہاولپور، رحیم یار خان اور راولپنڈی شامل ہیں۔

افتتاحی تقریب میں وزیراعلیٰ نے موبائل ہسپتال، چلتے پھرتے ڈینٹل ہسپتال اور ہیلتھ بائیکس کو خود دیکھا، بائیکس پر رکھی ادویات اور آلات کے بارے میں معلومات لیں اور ایک آلے سے اپنا درجہ حرارت بھی ناپا۔ وزیر محنت منشأ اللہ بٹ اور سیکرٹری دانش افضال نے پروگرام کی تفصیلات بتائیں، جبکہ وزیراعلیٰ موبائل ہسپتالوں کے ڈاکٹروں اور عملے سے بھی ملیں۔

بعد ازاں مریم نواز نواز شریف سوشل سکیورٹی ہسپتال کے او پی ڈی اور رحمتہ للعالمین کارڈیک سینٹر گئیں، جہاں انہوں نے کارڈیالوجی وارڈ کے مریضوں کی خیریت دریافت کی۔ وزیراعلیٰ نے بتایا کہ پنجاب کے 24 سوشل سکیورٹی ہسپتالوں سے ایک کروڑ سے زائد صنعتی مزدور اور ان کے گھرانے مستفید ہو رہے ہیں، اور پی ای ایس ایس آئی کے 250 میڈیکل آؤٹ لیٹس کے ذریعے بھی مزدوروں کو علاج کی سہولت دی جائے گی۔

ان کے بقول یہ پہلا موقع ہے کہ مزدور کو اس کے کارخانے میں اور اس کے گھر والوں کو گھر کی دہلیز پر علاج میسر آئے گا، جس سے بیماری کی جلد تشخیص ممکن ہوگی اور بڑے ہسپتالوں پر رش گھٹے گا۔ وزیراعلیٰ نے کہا کہ جس فیکٹری، تجارتی یا صنعتی یونٹ میں بھی مزدور کام کرتے ہوں، سوشل سکیورٹی کے موبائل یونٹ وہاں پہنچیں گے۔