حکومت کی پانچ سال میں 11 ہزار ارب روپے سے زائد ٹیکس چھوٹ کا انکشاف

اسلام آباد: حکومت کی جانب سے پانچ سال کے دوران 11 ہزار ارب روپے سے زائد کی ٹیکس چھوٹ دیے جانے کا انکشاف ہوا ہے۔

پیر کو قومی اسمبلی کا اجلاس اسپیکر سردار ایاز کی زیرصدارت منعقد ہوا، جس میں وقفہ سوالات کے دوران وزارت خزانہ نے گزشتہ پانچ سال کی ٹیکس چھوٹ کی تفصیلات پیش کیں۔

ٹیکس چھوٹ کی تفصیلات

وزارت خزانہ کے مطابق مالی سال 2020-21 سے 2024-25 تک مجموعی طور پر 11 ہزار 47 ارب روپے کی ٹیکس چھوٹ دی گئی۔

اس میں انکم ٹیکس کی مد میں 580 ارب، سیلز ٹیکس میں ایک ہزار 274 ارب اور کسٹم ڈیوٹی میں 499 ارب روپے شامل ہیں۔

نوجوانوں اور دیگر امور

اجلاس میں حکومت نے نوجوانوں کے لیے 300 ارب روپے کے قرضوں، ترقیاتی منصوبوں اور جامعات میں لازمی انٹرن شپ سے متعلق تفصیلات بھی پیش کیں۔

وزارت منصوبہ بندی کے مطابق وزیراعظم یوتھ بزنس اینڈ ایگریکلچر لون پروگرام کے تحت 5 لاکھ 18 ہزار نوجوانوں کو قرضے دیے گئے، جبکہ 2 لاکھ 30 ہزار نوجوانوں کو تربیت دینے کا ہدف مقرر ہے۔

ہائر ایجوکیشن کمیشن کے مطابق انڈرگریجویٹ ڈگری پروگراموں میں کم از کم تین کریڈٹ آورز کی انٹرن شپ یا فیلڈ تجربہ لازمی قرار دیا گیا ہے، اور 47 شعبہ جات کے قومی نصاب پر نظرثانی کی گئی ہے۔

کھاد کی قیمتوں پر حکومت نے یوریا کی قلت کی تردید کی، تاہم ڈی اے پی کی قیمت 14 ہزار 500 سے بڑھ کر 17 ہزار 500 روپے ہونے کا اعتراف کیا۔

ایل پی جی کی قیمتوں پر حکومت نے غریب گھرانوں کو ریلیف دینے کے لیے نئی پالیسی ایک سے دو روز میں مکمل کرنے کا اعلان کیا۔

اجلاس میں پارلیمانی سیکرٹریز کے دوسری وزارتوں کے سوالات کے جوابات دینے پر اسپیکر اور وزیر پارلیمانی امور کے درمیان اختلاف بھی سامنے آیا۔ بعدازاں کورم پورا نہ ہونے پر اجلاس منگل کی صبح گیارہ بجے تک ملتوی کر دیا گیا۔