طالبان کے ساتھ مل کر پی ٹی آئی کو اسلام آباد پر لشکر کشی نہیں کرنے دیں گے، گورنر راج آخری آپشن: خواجہ آصف

اسلام آباد (اعتماد ڈیسک): وزیر دفاع خواجہ آصف نے کہا ہے کہ خیبرپختونخوا میں گورنر راج آخری آپشن ہے اور حکومت کوشش کر رہی ہے کہ اس طرف نہ جانا پڑے، تاہم دارالحکومت کو پی ٹی آئی کے رحم و کرم پر نہیں چھوڑا جا سکتا۔

دُنیا نیوز سے گفتگو میں انہوں نے کہا کہ طالبان کے ساتھ مل کر پی ٹی آئی کو اسلام آباد پر لشکر کشی کی اجازت نہیں دی جائے گی اور اسلام آباد کی حفاظت حکومت کا فرض ہے۔

وزیر دفاع کا کہنا تھا کہ یہ تو وقت ہی بتائے گا کہ گورنر راج کی صورت میں پی ٹی آئی سیاسی شہید بنتی ہے یا نہیں، مگر ایک شخص کی خوشی کے لیے ملک کا شیرازہ بکھیرنا قبول نہیں۔

خواجہ آصف نے کہا کہ کے پی حکومت کی قیادت سے خدانخواستہ علیحدگی کی توقع بھی کی جا سکتی ہے، پی ٹی آئی کے اندر اختلافات بڑھ چکے ہیں اور پارٹی کے اپنے لوگ بھی اس بحران کا کوئی راستہ نکلتا دیکھنا چاہتے ہیں۔