صدر زرداری کے اعزاز میں برلن میں استقبالیہ تقریب، گارڈ آف آنر پیش

برلن: صدر مملکت آصف علی زرداری کے اعزاز میں جرمن وزارت دفاع میں والہانہ استقبالیہ تقریب منعقد ہوئی۔ صدر مملکت کو گارڈ آف آنر بھی پیش کیا گیا۔

جرمنی کے صدر فرینک والٹر شٹائن مائر نے وزارت دفاع آمد پر صدر زرداری کا استقبال کیا۔ تقریب میں دونوں ملکوں کے قومی ترانے بھی بجائے گئے۔

صدر مملکت جرمنی کے صدر کی دعوت پر دورہ کر رہے ہیں۔ گزشتہ 23 سال بعد کسی بھی پاکستانی سربراہ مملکت کا یہ پہلا دورہ جرمنی ہے۔ رواں برس پاکستان اور جرمنی اپنے سفارتی تعلقات کے قیام کی 75 ویں سالگرہ بھی منا رہے ہیں۔

صدر مملکت ایک اعلیٰ سطحی وفد کے ہمراہ جرمنی کے صدر اور اعلیٰ جرمن حکومتی عہدیداروں سے ملاقاتیں کریں گے، جن میں دوطرفہ تعلقات، علاقائی و عالمی صورتحال اور معاشی و تجارتی تعاون کے فروغ پر تبادلہ خیال ہوگا۔

صدر آصف علی زرداری کا دورہ جرمنی دوطرفہ تعلقات اور مختلف شعبوں میں باہمی اشتراک کے فروغ کو نئی جہت دینے میں معاون ثابت ہوگا۔