72 ممالک کی جیلوں میں 21 ہزار 647 پاکستانی قید، قومی اسمبلی میں تفصیلات پیش

اسلام آباد: دنیا کے 72 ممالک کی جیلوں میں 21 ہزار 647 پاکستانی قید ہیں۔ ان میں سب سے زیادہ 5 ہزار 297 پاکستانی متحدہ عرب امارات جبکہ 4 ہزار 775 سعودی عرب کی جیلوں میں قید ہیں۔ بھارت میں بھی 738 پاکستانی مختلف مقدمات میں قید ہیں۔

یہ تفصیلات وزیر خارجہ اسحاق ڈار کی جانب سے قومی اسمبلی میں وقفہ سوالات کے دوران تحریری جواب میں پیش کی گئیں۔

وزارت خارجہ کے جواب کے مطابق بیرون ملک قید پاکستانی شہری مختلف نوعیت کے مقدمات کا سامنا کر رہے ہیں، جن میں دھوکہ دہی، منشیات کی اسمگلنگ، جنسی حملے، جعلی ویزوں اور دستاویزات کا استعمال، قتل اور دیگر جرائم شامل ہیں۔

جواب میں کہا گیا ہے کہ متحدہ عرب امارات اور سعودی عرب میں پاکستانی قیدیوں کی تعداد دیگر ممالک کے مقابلے میں نمایاں طور پر زیادہ ہے۔ بیرون ملک قید پاکستانی شہریوں کے معاملات مختلف ممالک کے قوانین اور عدالتی کارروائیوں سے متعلق ہیں۔