قلعہ عبداللہ: شہید اے ایس آئی سعداللہ خان کے لواحقین کو شہداء پیکیج کے تحت ایک کروڑ 22 لاکھ کا چیک

قلعہ عبداللہ: حکومت بلوچستان کی جانب سے 19 نومبر 2025ء کو قبرستان چوکی قلعہ عبداللہ میں مسلح افراد کی فائرنگ سے شہید ہونے والے پولیس اسسٹنٹ سب انسپکٹر (اے ایس آئی) سعداللہ خان عرف ڈاکٹر کے لواحقین کو شہداء پیکیج کے تحت ایک کروڑ 22 لاکھ روپے کا امدادی چیک دے دیا گیا۔

یہ چیک شہید کے بیٹے جہانگیر خان کو ڈپٹی کمشنر قلعہ عبداللہ منور حسین مگسی، ڈسٹرکٹ پولیس آفیسر خلیل احمد بگٹی اور ایڈیشنل ڈپٹی کمشنر انجینئر نجم الدین کبزئی کی موجودگی میں دیا گیا۔ اس موقع پر عوامی نیشنل پارٹی کے ضلعی صدر ملک محمد حنیف اچکزئی، پاکستان پیپلز پارٹی کے ضلعی صدر نظر محمد خان کاکڑ، اکاؤنٹ آفیسر فیصل خان، انسپکٹر حبیب اللہ خان، کاکوزئی قوم کے معتبرین اور شہید کے بھائی محمد حنیف اور سیف اللہ بھی موجود تھے۔

ڈپٹی کمشنر منور حسین مگسی نے کہا کہ ملک، قوم اور عوام کے جان و مال کے تحفظ کے لیے جانوں کا نذرانہ پیش کرنے والے شہداء کی قربانیاں ہمیشہ یاد رکھی جائیں گی۔ شہید سعداللہ خان نے فرائضِ منصبی کی ادائیگی کے دوران عوام کے تحفظ اور امن و امان کے قیام کے لیے جان قربان کی، جو ایک عظیم قومی خدمت ہے۔

مقررین نے کہا کہ پولیس کے جوان امن و امان اور عوام کے تحفظ کے لیے بے مثال قربانیاں دے رہے ہیں اور شہداء کے خاندانوں کی فلاح و بہبود کے لیے حکومت اور متعلقہ ادارے اپنا کردار جاری رکھیں گے۔ شہید کے اہلِ خانہ نے امدادی پیکیج پر حکومت بلوچستان، ضلعی انتظامیہ اور پولیس حکام کا شکریہ ادا کیا، جبکہ قبائلی عمائدین نے امن اور ملک و قوم کی خدمت کے لیے کردار جاری رکھنے کے عزم کا اظہار کیا۔

تصویر: بشکریہ ڈی جی پی آر بلوچستان