خضدار میں یوم دفاع پاکستان پر ضلعی انتظامیہ کی ریلی، ڈپٹی کمشنر عبدالرزاق ساسولی کی قیادت

خضدار: یوم دفاع پاکستان کے موقع پر ضلعی انتظامیہ خضدار کی جانب سے شاندار ریلی نکالی گئی جس کی نگرانی ڈپٹی کمشنر خضدار عبدالرزاق ساسولی، کمانڈنٹ قلات اسکاؤٹس کرنل عرفان بنگش، ایس ایس پی خضدار دوستین دشتی، اسسٹنٹ کمشنر نال عبداللہ مینگل، شہری ایکشن کمیٹی خضدار کے صدر بشیر احمد جتک اور اسسٹنٹ کمشنر کرخ سعید احمد زہری نے کی۔

ریلی میں ضلعی افسران، پولیس، سرکاری محکموں کے اہلکاروں، سیاسی و سماجی شخصیات، طلباء، اساتذہ اور سول سوسائٹی نے بڑی تعداد میں شرکت کی۔ شرکاء نے قومی پرچم اٹھا رکھے تھے اور پاک فوج و سیکیورٹی اداروں کے شہداء و غازیوں کو خراج عقیدت پیش کرتے ہوئے «پاکستان زندہ باد، پاک فوج زندہ باد» اور «شہداء کو سلام» کے نعرے لگائے۔

مقررین نے کہا کہ 6 ستمبر وہ قابلِ فخر دن ہے جب قوم اور مسلح افواج نے اتحاد اور بے مثال بہادری سے وطن کا دفاع کیا، اور یہ دن شہداء کی قربانیوں کو یاد رکھنے اور قومی یکجہتی کے فروغ کا پیغام دیتا ہے۔ ریلی کے اختتام پر ملک کی سلامتی، ترقی و خوشحالی اور شہداء کے درجات کی بلندی کے لیے دعا کی گئی۔

تصویر: بشکریہ ڈی جی پی آر بلوچستان