یومِ شہداء پولیس: وزیر داخلہ ضیاء اللہ لانگو کا بلوچستان پولیس کو جدید ہتھیاروں سے لیس کرنے کا اعلان

کوئٹہ: صوبائی وزیر داخلہ بلوچستان میر ضیاء اللہ لانگو نے کہا ہے کہ بلوچستان پولیس کے افسران اور جوانوں نے صوبے میں امن و امان کے قیام کے لیے لازوال قربانیاں دی ہیں اور ان کی خدمات ہمیشہ سنہری حروف میں یاد رکھی جائیں گی۔

یومِ شہداء پولیس کی تقریب سے بحیثیت مہمانِ خصوصی خطاب کرتے ہوئے انہوں نے کہا کہ بلوچستان ایک حساس صوبہ ہے جہاں دہشت گردی سمیت مختلف سیکیورٹی چیلنجز کا سامنا ہے، تاہم بلوچستان پولیس نے اپنی پیشہ ورانہ صلاحیتوں اور جرات کے ذریعے قیامِ امن میں کلیدی کردار ادا کیا ہے۔ انہوں نے کہا کہ بلوچستان پولیس کو مستقبل کے چیلنجز سے نمٹنے کے لیے جدید ہتھیاروں اور آلات سے لیس کیا جائے گا۔

میر ضیاء اللہ لانگو نے کہا کہ بلوچستان پولیس نے عوام کے جان و مال کے تحفظ کو ہمیشہ اولین ترجیح دی اور ہر مشکل گھڑی میں اپنی ذمہ داریاں احسن انداز میں نبھائیں۔ حکومت بلوچستان شہداء کی عظیم قربانیوں کو کبھی فراموش نہیں کرے گی اور ان کے اہلِ خانہ کی فلاح و بہبود کے لیے ہر ممکن اقدامات جاری رکھے گی۔

وزیر داخلہ نے کہا کہ شہداء کا احترام ہم سب پر فرض ہے کیونکہ انہی کی قربانیوں کی بدولت آج امن قائم ہے۔ انہوں نے بلوچستان پولیس کے افسران اور جوانوں کو خراجِ تحسین پیش کرتے ہوئے کہا کہ ان کی خدمات پوری قوم کے لیے باعثِ فخر ہیں۔

انہوں نے اس عزم کا اظہار کیا کہ حکومت، پولیس و دیگر قانون نافذ کرنے والے اداروں اور عوام کے باہمی تعاون سے بلوچستان کو امن، ترقی اور خوشحالی کا گہوارہ بنایا جائے گا۔

تصویر: بشکریہ ڈی جی پی آر بلوچستان