ڈی آئی جی لورالائی جنید احمد شیخ کا سنجاوی میں پولیس دربار، مانگی ڈیم کے شہداء کے لواحقین سے تعزیت

سنجاوی: ڈپٹی انسپکٹر جنرل آف پولیس لورالائی رینج جنید احمد شیخ نے سنجاوی کا دورہ کیا، جہاں انہوں نے پولیس اہلکاروں کے مسائل سننے کے لیے پولیس دربار منعقد کیا۔

ڈی آئی جی نے مانگی ڈیم میں شہید ہونے والے پولیس اہلکاروں کے لواحقین سے ملاقات کر کے تعزیت کی اور شہداء کے درجات کی بلندی کے لیے فاتحہ خوانی کی۔ اس موقع پر انہوں نے کہا کہ شہادت اللہ تعالیٰ کی طرف سے عطا کیا جانے والا عظیم رتبہ ہے، جس پر پوری قوم اور محکمہ پولیس کو فخر ہے۔ پولیس فورس کا حوصلہ آج بھی بلند ہے اور دہشت گردی کے خلاف جنگ میں پولیس ہر وقت صفِ اول میں کھڑی رہے گی۔

ڈی آئی جی جنید احمد شیخ نے شہداء کے لواحقین کو یقین دلایا کہ وہ خود کو ہرگز تنہا نہ سمجھیں، محکمہ پولیس ہر مشکل گھڑی میں ان کے ساتھ کھڑا ہے۔ انہوں نے کہا کہ شہداء نے وطن کے دفاع اور عوام کے تحفظ کے لیے اپنی جانوں کا نذرانہ پیش کیا جو پوری قوم کے لیے باعثِ فخر اور عظیم اعزاز ہے، اور محکمہ پولیس ہر سطح پر شہداء کے خاندانوں کی بھرپور معاونت اور حوصلہ افزائی جاری رکھے گا۔

بعد ازاں سنجاوی میں منعقدہ پولیس دربار میں پولیس ملازمین نے اپنے پیشہ ورانہ اور انتظامی مسائل پیش کیے، جن پر ڈی آئی جی نے تفصیلی غور کیا اور متعدد مسائل کے فوری حل کے لیے موقع پر ہی احکامات جاری کیے۔ انہوں نے کہا کہ پولیس اہلکاروں کی فلاح و بہبود اور مسائل کا بروقت ازالہ محکمہ پولیس کی اولین ترجیحات میں شامل ہے تاکہ وہ بہتر انداز میں اپنے فرائض انجام دے سکیں۔

تصویر: بشکریہ ڈی جی پی آر بلوچستان