دکی کو منشیات سے پاک بنانے کا عزم: ڈسٹرکٹ نارکوٹکس کنٹرول سیل کمیٹی کا اجلاس، چرس و بھنگ تلفی مہم کا جائزہ

دکی: ڈپٹی کمشنر دکی فضل الرحمن کبدانی کی زیر صدارت ڈسٹرکٹ نارکوٹکس کنٹرول سیل کمیٹی (DNCC) کا اجلاس منعقد ہوا، جس میں ضلع میں منشیات کی روک تھام، غیر قانونی کاشت کے خاتمے اور انسدادی اقدامات کا جائزہ لیا گیا۔ اجلاس میں ایس پی دکی منصور احمد بزدار، اینٹی نارکوٹکس فورس کے نمائندے، حساس اداروں کے افسران، ڈپٹی ڈائریکٹر زراعت اور ایکسائز اینڈ ٹیکسیشن آفیسر سمیت دیگر افسران شریک ہوئے۔

چرس/بھنگ تلفی مہم 2026 کے تحت غیر قانونی کاشت کے خاتمے کے لیے اداروں کے درمیان رابطہ کاری اور مشترکہ کارروائیوں کو مزید مربوط بنانے پر زور دیا گیا۔ نوجوانوں کو منشیات کے مضر اثرات سے بچانے کے لیے آگاہی مہمات، تعلیمی اداروں اور عوامی مقامات پر شعور اجاگر کرنے اور منشیات کے کاروبار کے خلاف قانونی کارروائیاں یقینی بنانے کی ہدایت بھی کی گئی۔

ضلعی انتظامیہ، پولیس، ایف سی، اینٹی نارکوٹکس فورس اور دیگر اداروں کے درمیان مربوط حکمتِ عملی کو مؤثر بنانے کی ہدایات جاری کی گئیں۔ ڈپٹی کمشنر نے عزم ظاہر کیا کہ ضلع دکی کو منشیات سے پاک بنانے اور نوجوان نسل کو اس لعنت سے بچانے کے لیے تمام ادارے مل کر اپنی ذمہ داریاں ادا کریں گے۔

تصویر: بشکریہ ڈی جی پی آر بلوچستان