ڈپٹی کمشنر دکی کا ڈی ایچ کیو ہسپتال کا دورہ، زیرِ تعمیر آپریشن تھیٹر جلد مکمل کرنے کی ہدایت

دکی: ڈپٹی کمشنر دکی فضل الرحمن کبدانی نے ڈسٹرکٹ ہیڈکوارٹر ہسپتال دکی کا دورہ کیا اور مختلف وارڈز اور شعبہ جات کا معائنہ کرتے ہوئے مریضوں کو فراہم کی جانے والی طبی سہولیات، ادویات اور طبی سامان کی دستیابی، صفائی ستھرائی، عملے کی حاضری اور دیگر انتظامی امور کا جائزہ لیا۔ انہوں نے مریضوں اور ان کے لواحقین سے سہولیات کے بارے میں بھی دریافت کیا۔

ڈپٹی کمشنر نے عملے کی حاضری چیک کرتے ہوئے ہدایت کی کہ ڈاکٹرز، پیرا میڈیکل اسٹاف اور دیگر ملازمین ڈیوٹی پر بروقت موجود رہیں اور علاج معالجے میں کوئی غفلت نہ برتی جائے۔ انہوں نے ہسپتال کے تمام وارڈز، گیلریوں، واش رومز اور اطراف میں صفائی کے مؤثر اور مستقل انتظامات یقینی بنانے کی ہدایت کی اور کہا کہ صاف ستھرا ماحول مریضوں کی بہتر نگہداشت کے لیے انتہائی ضروری ہے۔

بعد ازاں ڈپٹی کمشنر نے ہسپتال میں زیرِ تعمیر آپریشن تھیٹر کا معائنہ کیا، منصوبے پر بریفنگ لی اور ہدایت کی کہ کام مقررہ معیار اور فنی تقاضوں کے مطابق جلد از جلد مکمل کیا جائے تاکہ عوام کو سرجری کی بہتر اور بروقت سہولیات مل سکیں۔ انہوں نے ہسپتال انتظامیہ کو ادویات، تشخیص اور علاج کی فراہمی میں کوئی رکاوٹ نہ آنے دینے اور امور کی باقاعدہ نگرانی کی ہدایت کی۔

فضل الرحمن کبدانی نے کہا کہ عوام کو معیاری، بروقت اور مؤثر صحت کی سہولیات کی فراہمی ضلعی انتظامیہ کی اولین ترجیح ہے اور سرکاری ہسپتالوں کے انتظامی معاملات، صفائی، ادویات کی دستیابی اور عملے کی حاضری پر خصوصی توجہ دی جا رہی ہے۔ انہوں نے واضح کیا کہ طبی خدمات اور مریضوں کی دیکھ بھال میں کوئی غفلت برداشت نہیں کی جائے گی اور سرکاری اداروں میں عوامی مسائل کے فوری ازالے کے لیے نگرانی کا عمل مزید مؤثر بنایا جائے گا۔

تصویر: بشکریہ ڈی جی پی آر بلوچستان