دکی میں یومِ استحصالِ کشمیر پر ریلی اور سیمینار، اسسٹنٹ کمشنر تھل چوٹیالی عبدالسلام شاہوانی کی صدارت

دکی: حکومتِ بلوچستان کے وژن اور وزیر اعلیٰ بلوچستان میر سرفراز بگٹی کی ہدایات کی روشنی میں ضلعی انتظامیہ دکی کے زیرِ اہتمام یومِ استحصالِ کشمیر قومی جذبے اور بھرپور یکجہتی کے ساتھ منایا گیا۔ اس سلسلے میں ریلی، سیمینار اور دعائیہ تقریب منعقد ہوئی، جن کی صدارت اسسٹنٹ کمشنر تھل چوٹیالی عبدالسلام شاہوانی نے کی۔

تقریبات کا آغاز ریلی سے ہوا، جس میں سرکاری محکموں کے افسران، اہلکاروں، سیاسی و سماجی شخصیات، طلبہ اور شہریوں نے بڑی تعداد میں شرکت کی۔ شرکاء نے قومی پرچم، بینرز اور پلے کارڈز اٹھا رکھے تھے جن پر کشمیری عوام کی حمایت، حقِ خودارادیت اور بھارتی اقدامات کے خلاف نعرے درج تھے۔

تقریب سے خطاب میں عبدالسلام شاہوانی نے کہا کہ 5 اگست 2019 کو بھارت کی جانب سے مقبوضہ جموں و کشمیر کی خصوصی آئینی حیثیت کا خاتمہ بین الاقوامی قوانین، اقوامِ متحدہ کی قراردادوں اور کشمیری عوام کے بنیادی حقوق کی صریح خلاف ورزی تھا۔ انہوں نے کہا کہ پاکستان اپنے اصولی مؤقف کے مطابق ہر سیاسی، سفارتی اور اخلاقی فورم پر کشمیری عوام کے حقِ خودارادیت کی حمایت جاری رکھے ہوئے ہے اور یہ حمایت بلا تعطل جاری رہے گی۔

دیگر مقررین نے کہا کہ اس دن کا مقصد عالمی برادری کی توجہ مقبوضہ کشمیر میں انسانی حقوق کی مسلسل خلاف ورزیوں، شہری آزادیوں پر پابندیوں اور کشمیری عوام کی مشکلات کی جانب مبذول کرانا ہے، اور مسئلہ کشمیر کا پائیدار حل اقوامِ متحدہ کی قراردادوں اور کشمیری عوام کی امنگوں کے مطابق ہی ممکن ہے۔ انہوں نے کہا کہ پاکستان اور بلوچستان کے عوام کشمیری بھائیوں اور بہنوں کے شانہ بشانہ کھڑے ہیں۔

تقریب کے اختتام پر کشمیر کے شہداء کے درجات کی بلندی، کشمیری عوام کی جلد آزادی اور پاکستان کی سلامتی، استحکام، ترقی اور خوشحالی کے لیے خصوصی دعا کی گئی۔

تصویر: بشکریہ ڈی جی پی آر بلوچستان