کیچ: لوکل سرٹیفکیٹ برانچ دشت تربت سے تحصیل ہیڈکوارٹر کھڈان منتقل، شہریوں کو دہلیز پر سہولت

تربت: ڈپٹی کمشنر کیچ یاسر اقبال دشتی نے عوام کو سرکاری سہولیات ان کی دہلیز پر فراہم کرنے کے سلسلے میں اہم انتظامی اقدام اٹھاتے ہوئے لوکل سرٹیفکیٹ برانچ دشت کو تربت سے تحصیل دشت کے ہیڈکوارٹر کھڈان منتقل کر دیا ہے۔ اس اقدام کے بعد تحصیل دشت کے ہزاروں شہریوں کو لوکل سرٹیفکیٹ کے حصول کے لیے تربت آنے کی ضرورت نہیں رہے گی اور انہیں یہ سہولت اپنے ہی علاقے میں دستیاب ہوگی۔

ضلعی انتظامیہ کے مطابق نئی برانچ کے انتظامی امور کی انجام دہی کے لیے ثنا اللہ اور امام بخش کو انچارج مقرر کیا گیا ہے، جبکہ برانچ کا باقاعدہ افتتاح ڈپٹی کمشنر کیچ یاسر اقبال دشتی آئندہ دو روز کے دوران کریں گے۔

اس سے قبل دشت کے شہریوں کو لوکل سرٹیفکیٹ کے لیے طویل فاصلہ طے کر کے تربت آنا پڑتا تھا، جس کے باعث انہیں سفری اخراجات، وقت کے ضیاع اور دیگر انتظامی مشکلات کا سامنا تھا۔ نئی برانچ کے قیام سے ان مسائل میں نمایاں کمی آئے گی اور عوام کو بروقت اور آسان سرکاری خدمات میسر ہوں گی۔

ڈپٹی کمشنر کیچ یاسر اقبال دشتی نے عہدہ سنبھالنے کے بعد ضلع بھر میں عوامی خدمات کی فراہمی کو مزید مؤثر اور سہل بنانے کے لیے مختلف اقدامات کیے ہیں، اور دشت میں لوکل سرٹیفکیٹ برانچ کی منتقلی بھی اسی سلسلے کی ایک اہم کڑی ہے۔

علاقہ مکینوں نے ضلعی انتظامیہ کے اس اقدام کو سراہتے ہوئے اسے دشت کے عوام کا دیرینہ مطالبہ قرار دیا اور امید ظاہر کی کہ مستقبل میں بھی عوامی فلاح اور بہتر طرزِ حکمرانی کے لیے ایسے مؤثر اقدامات جاری رکھے جائیں گے۔

تصویر: بشکریہ ڈی جی پی آر بلوچستان