تربت: اسسٹنٹ کمشنر بلیدہ ابوبکر بلوچ کا ترقیاتی منصوبوں اور سرکاری دفاتر کا معائنہ

تربت: ڈپٹی کمشنر کیچ یاسر اقبال دشتی کی ہدایت پر اسسٹنٹ کمشنر بلیدہ ابوبکر بلوچ نے بلیدہ میں مختلف سرکاری دفاتر، عوامی سہولیات اور جاری ترقیاتی منصوبوں کا تفصیلی معائنہ کیا۔

اسسٹنٹ کمشنر نے لوکل سرٹیفکیٹ برانچ اور دفتر کا دورہ کر کے عوام کو فراہم کی جانے والی خدمات، ریکارڈ اور دفتری امور کا جائزہ لیا اور عملے کو ہدایت کی کہ عوام کو بروقت، شفاف اور میرٹ کی بنیاد پر خدمات کی فراہمی ہر صورت یقینی بنائی جائے۔

بعد ازاں انہوں نے ڈمبانی روڈ پر زیرِ تعمیر پل، بلیدہ۔تربت روڈ تا کوشک روڈ، کالج مسجد، کالج کی اندرونی سڑک، پرنسپل لاؤنج، بیچلر لاؤنج، ڈمبانی بازار میں حفاظتی بند (Protection Band)، کورِ پشت بٹ، پل اور اندرونی سڑکوں سمیت مختلف زیرِ تعمیر ترقیاتی منصوبوں کا معائنہ کیا، جہاں متعلقہ حکام نے جاری پیش رفت پر تفصیلی بریفنگ دی۔

ابوبکر بلوچ نے تعمیراتی معیار، رفتارِ کار اور دستیاب سہولیات کا جائزہ لیتے ہوئے ہدایت کی کہ تمام ترقیاتی منصوبے مقررہ معیار، شفافیت اور مقررہ مدت کے اندر مکمل کیے جائیں تاکہ عوام کو جلد از جلد بہتر سفری، تعلیمی اور بنیادی سہولیات میسر آ سکیں۔

انہوں نے واضح کیا کہ ضلعی انتظامیہ ڈپٹی کمشنر کیچ یاسر اقبال دشتی کی ہدایات کی روشنی میں تمام ترقیاتی منصوبوں کی مسلسل نگرانی کر رہی ہے، اور عوامی مفاد کے منصوبوں میں کسی قسم کی غفلت، تاخیر یا ناقص معیار ہرگز برداشت نہیں کیا جائے گا۔

تصویر: بشکریہ ڈی جی پی آر بلوچستان