جعفرآباد: عبدالمجید بادینی اور ڈپٹی کمشنر خالد خان کا کینالز کا دورہ، ٹیل تک پانی پہنچانے کی ہدایت

جعفرآباد: پارلیمانی سیکرٹری برائے ایس اینڈ جی اے ڈی انجینئر عبدالمجید بادینی نے ڈپٹی کمشنر جعفرآباد خالد خان کے ہمراہ ضلع جعفرآباد میں مختلف ذیلی کینالز کا دورہ کر کے پانی کی ترسیل کا جائزہ لیا۔

اس موقع پر محکمہ ایریگیشن کے سب ڈویژنل آفیسر مراد بخش مری بھی موجود تھے، جنہوں نے پانی کی موجودہ صورتحال، نہروں میں بہاؤ اور کاشتکاروں کو پانی کی فراہمی سے متعلق تفصیلی بریفنگ دی۔

انجینئر عبدالمجید بادینی اور ڈپٹی کمشنر خالد خان نے ہدایت کی کہ پانی کی منصفانہ تقسیم یقینی بنائی جائے تاکہ ٹیل کے کاشتکاروں تک زرعی پانی پہنچ سکے، جبکہ کاشتکاروں کو ان کے مقررہ حصے کے مطابق پانی کی بروقت فراہمی کے لیے تمام دستیاب وسائل بروئے کار لائے جائیں۔

انہوں نے کہا کہ حکومت زرعی شعبے کے تحفظ اور کسانوں کے مسائل کے حل کو اولین ترجیح دے رہی ہے۔ اس وقت جعفرآباد کے ٹیل کے کاشتکاروں کو زرعی پانی کی کمی کی وجہ سے سخت مشکلات درپیش ہیں، جن کا تدارک انتہائی ضروری ہے۔

تصویر: بشکریہ ڈی جی پی آر بلوچستان