تربت: جامعہ تربت میں وائس چانسلر کی ہدایت پر المنائی نیٹ ورکنگ کا آغاز

تربت: جامعہ تربت کے وائس چانسلر پروفیسر ڈاکٹر گل حسن کی ہدایت پر کوالٹی انہانسمنٹ سیل (کیو ای سی) کے ڈیٹا مینجمنٹ سسٹم کے تحت المنائی نیٹ ورکنگ کا باضابطہ آغاز کر دیا گیا ہے۔

اس اقدام کا بنیادی مقصد فارغ التحصیل طلبہ (Alumni) کی پیشہ ورانہ ترقی، باہمی روابط کے فروغ اور کیریئر میں آگے بڑھنے کے لیے معاونت فراہم کرنا ہے۔

نیٹ ورک کے مقاصد

جامعہ تربت کے ترجمان کے مطابق ڈگری کی تکمیل کے بعد بھی طلبہ کی مسلسل رہنمائی اور کیریئر گائیڈنس جامعہ کے وژن اور اسٹریٹجک پلان کا بنیادی حصہ ہے۔ یہ نیٹ ورک گریجویٹس کو قومی و عالمی سطح پر پیشہ ور افراد سے جوڑنے، روزگار اور کاروبار کے نئے مواقع فراہم کرنے اور جامعہ کی تقریبات، بزم المنائی اور فیصلہ سازی میں گریجویٹس کی شرکت کو یقینی بنانے کا موثر ذریعہ ثابت ہوگا۔

مزید برآں، ادارے کی ترقی کے لیے المنائی کی تجاویز کو ترجیح دینے کے ساتھ ساتھ انٹرن شپس اور روزگار کے مواقع کی فراہمی، نیز موجودہ طلبہ کی رہنمائی کے لیے بھی ان کے تجربے سے استفادہ کیا جائے گا۔

جامعہ تربت اپنے تمام گریجویٹس کو دعوت دیتی ہے کہ وہ آفیشل آن لائن لنک کے ذریعے فوری رجسٹریشن کرائیں اور جامعہ کی جانب سے اعلان کردہ سہولیات سے مستفید ہوں۔