ون ڈے کرکٹ میں ریورس سوئنگ کی واپسی، نئے قانون سے بیٹرز کی مشکلات بڑھ گئیں

اسلام آباد: ون ڈے انٹرنیشنل کرکٹ میں کھیلنے کے قوانین میں تبدیلی کے بعد ریورس سوئنگ ایک بار پھر اہم ہتھیار بن کر سامنے آ گئی ہے۔

میڈیا رپورٹ کے مطابق جولائی 2025 میں متعارف کرائے گئے نئے قانون کے تحت کپتان 34 اوورز مکمل ہونے کے بعد دونوں سروں پر استعمال ہونے والی سفید گیندوں میں سے کسی ایک کا انتخاب کر سکتے ہیں۔ اس سے اننگز کے آخری 16 اوورز میں گیند زیادہ پرانی اور کھردری ہو جاتی ہے۔ اس تبدیلی کا مقصد بولرز کو بہتر مواقع فراہم کرنا تھا۔

اعداد و شمار کیا کہتے ہیں

اعداد و شمار کے مطابق قانون میں تبدیلی کے بعد آخری 10 اوورز میں فاسٹ بولرز کی نصف فل لینتھ گیندوں پر ایک ڈگری سے زیادہ سوئنگ دیکھی گئی، جو گزشتہ شرح سے تقریباً 35 فیصد زیادہ ہے۔ آخری پانچ اوورز میں بولرز کا اکانومی ریٹ بھی 8.40 سے کم ہو کر 7.95 رنز فی اوور رہ گیا ہے۔

انگلینڈ کے کوچ برینڈن میک کولم نے سری لنکا کے خلاف شکست کے بعد کھلاڑیوں کو نئی صورتحال کے مطابق حکمت عملی تبدیل کرنے پر غور کرنے کا مشورہ دیا۔

پاکستان کے شاہین آفریدی اور نسیم شاہ سمیت کئی عالمی بولرز کے لیے بھی یہ تبدیلی اہم ثابت ہو سکتی ہے۔ شاہین آخری اوورز میں اوسطاً 1.3 ڈگری سوئنگ حاصل کر رہے ہیں۔

تاہم ریورس سوئنگ میں اضافہ ہر ملک میں یکساں نہیں۔ انگلینڈ میں نمایاں تبدیلی دیکھی گئی ہے، جبکہ جنوبی افریقا میں آئندہ ورلڈ کپ سے قبل اس کے اثرات کا اندازہ لگانا ابھی مشکل ہے۔

ماہرین کے مطابق اگر یہ رجحان برقرار رہا تو ٹیموں کو آخری اوورز کے بجائے اننگز کے ابتدائی حصے میں زیادہ رنز بنانے کی حکمت عملی اپنانا پڑ سکتی ہے۔