امریکا کا اسرائیل سے مغربی کنارے میں پرتشدد آبادکاروں کے خلاف سخت کارروائی کا مطالبہ: مارکو روبیو

واشنگٹن: امریکا نے اسرائیل سے مغربی کنارے میں پرتشدد کارروائیاں کرنے پر اسرائیلی آبادکاروں کے خلاف سخت کارروائی کا مطالبہ کیا ہے۔

غیر ملکی خبر رساں ادارے کے مطابق امریکی وزیر خارجہ مارکو روبیو نے صحافیوں سے گفتگو میں کہا کہ فلسطینیوں اور صحافیوں پر حملوں کی تصاویر اور رپورٹس تشویشناک ہیں۔

ان کا بیان ایسے وقت میں سامنے آیا ہے جب دو دن پہلے مغربی کنارے کے ایک گاؤں میں اسرائیلی آبادکاروں نے حملہ کرکے متعدد فلسطینیوں اور امریکی اخبار واشنگٹن پوسٹ کی فوٹوگرافر ہیڈی لیوین کو زخمی کر دیا تھا۔

امریکی وزیر خارجہ نے اسرائیل سے حملے روکنے کے لیے مؤثر اقدامات کا مطالبہ کیا۔ انہوں نے امریکی صحافی پر حملے کے معاملے پر امریکی سفارتخانے سے تفصیلات طلب کرتے ہوئے کہا کہ حقائق سامنے آنے کے بعد اسرائیلی حکام کو متوقع اقدامات سے آگاہ کریں گے۔

انہوں نے مزید کہا کہ 27 ستمبر سے اب تک مغربی کنارے میں فلسطینیوں پر آبادکاروں کے 170 حملے رپورٹ ہوئے ہیں۔ امریکی صدر ڈونلڈ ٹرمپ مغربی کنارے میں کشیدگی یا نیا بحران نہیں چاہتے۔

واضح رہے کہ گزشتہ روز مقبوضہ مغربی کنارے میں اسرائیلی آبادکاروں نے یورپی سفارت کاروں کے قافلے پر حملہ کرکے 78 سالہ فرانسیسی میئر برنارڈ باڈوکس کو تشدد کا نشانہ بنایا۔