بلی جین کنگ کپ ایشیا اوشیانا گروپ تھری 21 سے 24 اکتوبر تک اسلام آباد میں کھیلا جائے گا

اسلام آباد: پاکستان میں پہلی بار بلی جین کنگ کپ ایشیا اوشیانا گروپ تھری ٹینس ٹورنامنٹ 21 سے 24 اکتوبر تک کھیلا جائے گا۔ مقابلے پاکستان ٹینس فیڈریشن ٹینس کمپلیکس میں ہوں گے۔

ایونٹ میں پاکستان سمیت آٹھ ممالک کی خواتین ٹینس ٹیمیں شرکت کریں گی۔ ان میں بحرین، بھوٹان، ایران، اردن، کویت، مالدیپ، پاکستان اور قطر کی ٹیمیں شامل ہیں۔

صدر پاکستان ٹینس فیڈریشن اعصام الحق کے مطابق پاکستان میں پہلی بار بلی جین کنگ کپ کی میزبانی ملک میں خواتین ٹینس کے فروغ کے لیے اہم پیش رفت ہے۔

اعصام الحق نے کہا کہ بلی جین کنگ کپ سے پاکستانی کھلاڑیوں کو ہوم گراؤنڈ پر بین الاقوامی کھلاڑیوں کے خلاف کھیلنے کا موقع ملے گا۔ ان کا کہنا تھا کہ اس کی میزبانی پاکستان میں بین الاقوامی ٹینس مقابلوں کے انعقاد کی صلاحیت کا ثبوت ہے۔

پاکستان ٹینس فیڈریشن کی جانب سے شریک ٹیموں، آفیشلز اور وفود کے استقبال اور ٹورنامنٹ کے کامیاب انعقاد کے لیے انتظامات جاری ہیں۔