جامعہ تربت میں عالمی یوم اساتذہ کی تقریب، وائس چانسلر کا اساتذہ کو ترقی کے بروقت مواقع دینے کا عزم

تربت: ہیلپنگ ہینڈز فار ریلیف اینڈ ڈیولپمنٹ نے جامعہ تربت کے ڈائریکٹوریٹ آف اسٹوڈنٹ افیئرز کے تعاون سے عالمی یوم اساتذہ کی مناسبت سے یونیورسٹی میں پروقار تقریب منعقد کی، جس میں فیکلٹی ممبران، ہیلپنگ ہینڈز کے نمائندوں اور علاقائی اسکولوں و کالجوں کے سربراہان اور اساتذہ کی بڑی تعداد نے شرکت کی۔

چیئرمین شعبہ مینجمنٹ سائنسز ڈاکٹر غلام جان، چیئرپرسن شعبہ تعلیم محترمہ رقیہ میروانی، ہیلپنگ ہینڈز کے نمائندے غلام اعظم دشتی اور دیگر مقررین نے اساتذہ کی خدمات کو خراجِ تحسین پیش کیا۔ انہوں نے کہا کہ اساتذہ طلبہ میں تخلیقی و علمی صلاحیتیں اجاگر کرنے اور ان کی کردار سازی میں بنیادی کردار ادا کرتے ہیں، اور ان کی محنت کلاس روم تک محدود نہیں بلکہ وہ پورے معاشرے کی اخلاقی و فکری اصلاح میں بھی اہم کردار ادا کرتے ہیں۔

وائس چانسلر پروفیسر ڈاکٹر گل حسن نے اپنے خصوصی پیغام میں کہا کہ طلبہ کی تعلیمی و پیشہ ورانہ ترقی میں اساتذہ کا کردار کلیدی ہے۔ "بحیثیت استاد میں اس بات پر پختہ یقین رکھتا ہوں کہ اساتذہ کو کیریئر میں پیش رفت اور ترقی کے بروقت مواقع فراہم کرنا ان کا بنیادی حق ہے۔" انہوں نے کہا کہ فیکلٹی اور انتظامی عملے کو آگے بڑھنے کے مواقع دینا اور خالی آسامیاں پُر کرنا اولین ترجیحات میں شامل ہے۔

ترجمان یونیورسٹی کے مطابق وائس چانسلر نے کہا کہ انتظامیہ سینئر فیکلٹی اور آئینی اسامیوں کو پُر کرنے کے لیے ترجیحی بنیادوں پر اقدامات کر رہی ہے، جو جامعہ تربت کی پائیدار ترقی اور پانچ سالہ اسٹریٹجک پلان (2026-2030) کے اہداف کے لیے ناگزیر ہیں۔ تقریب کے اختتام پر اساتذہ میں یادگاری شیلڈز، تحائف اور شجرکاری کی ترغیب کے لیے پودے تقسیم کیے گئے۔

تصویر: بشکریہ ڈی جی پی آر بلوچستان