یونیورسٹی آف مکران پنجگور میں چائنیز ایمبیسیڈر اسکالرشپ کے تحت 125 طلبہ میں اسکالرشپ لیٹرز تقسیم

پنجگور: یونیورسٹی آف مکران میں چائنیز ایمبیسیڈر اسکالرشپ کے تحت 125 مستحق طلبا و طالبات میں اسکالرشپ لیٹرز تقسیم کرنے کی پروقار تقریب منعقد ہوئی۔ یہ اسکالرشپ چائنیز ایمبیسیڈر کی جانب سے یونیورسٹی کو فراہم کیا گیا، جسے یونیورسٹی نے اپنے شفاف Need-Based Scholarship Program کے تحت مالی طور پر مستحق طلبا و طالبات میں تقسیم کیا۔

تقریب کے مہمانِ خصوصی وائس چانسلر پروفیسر ڈاکٹر میر سادات بلوچ نے منتخب طلبا و طالبات میں اسکالرشپ لیٹرز تقسیم کیے۔ اس موقع پر ڈین یونیورسٹی آف مکران ڈاکٹر محمد یونس بلوچ اور اسسٹنٹ ڈائریکٹر اسٹوڈنٹ افیئرز عطا مہر موجود تھے۔

وائس چانسلر نے کہا کہ یونیورسٹی آف مکران ہمیشہ اس بات پر یقین رکھتی ہے کہ کوئی باصلاحیت طالب علم صرف مالی مشکلات کی وجہ سے اعلیٰ تعلیم سے محروم نہ رہے۔ انہوں نے اس اسکالرشپ کو پاک چین دوستی، باہمی اعتماد اور تعلیمی تعاون کا عملی مظہر قرار دیا۔

پہلا باقاعدہ نیڈ بیسڈ اسکالرشپ پروگرام

وائس چانسلر نے بتایا کہ یونیورسٹی میں پہلی مرتبہ باقاعدہ Need-Based Scholarship Program شروع کیا گیا ہے، جس کے تحت مستحق طلبا کی معاونت کے لیے منظم اور شفاف نظام وضع کیا گیا ہے۔ 125 طلبا و طالبات کا انتخاب Need-Based Scholarship Committee نے مکمل شفافیت سے کیا، جس میں یونیورسٹی کے نمائندوں کے علاوہ ضلعی انتظامیہ اور بیرونی ماہرینِ تعلیم بھی شامل تھے، اور انتخاب میرٹ اور مالی ضرورت کی بنیاد پر کیا گیا۔

انہوں نے کہا کہ اسکالرشپ کی رقم طلبا کی ٹیوشن فیس میں ایڈجسٹ کی جائے گی تاکہ وہ اپنی تعلیم بلا تعطل جاری رکھ سکیں۔ یونیورسٹی ہر سمسٹر میرٹ اسکالرشپ پروگرام بھی باقاعدگی سے جاری رکھے ہوئے ہے، جس کے تحت نمایاں تعلیمی کارکردگی دکھانے والے طلبا کو میرٹ پر اسکالرشپس دی جاتی ہیں۔

تقریب کے اختتام پر وائس چانسلر نے اسکالرشپ کے لیے چائنہ گورنمنٹ کا خصوصی شکریہ ادا کیا اور کہا کہ ایسے تعلیمی تعاون سے مستحق طلبا کو مدد ملنے کے ساتھ پاکستان اور چین کے درمیان دیرینہ دوستی اور تعلیمی روابط مزید مستحکم ہوتے ہیں۔ انہوں نے کہا کہ یونیورسٹی مستقبل میں بھی قومی اور بین الاقوامی اداروں کے تعاون سے مزید اسکالرشپ پروگرام متعارف کرانے کی کوشش جاری رکھے گی۔

تصویر: بشکریہ ڈی جی پی آر بلوچستان